29/12/2020

Mwasıf i klayto dmahwiyowole u camaydan ba qrobe du huroro du Iraq me Dacış

U rişono du şutoso di mşaynutho athronoyto du Iraq rabhaylawotho Cabd Alğani Alasadi, bi socurutho dsımle li mditho Suryoyto d’Barıtle bi daşto d’Ninwe, mwasafle i klayto dmahwiyowole u camaydan ba qrobe du huroro du Iraq mu tukoso marıhbono dı Dacış.

 Mxasra hreto, u diwan da waqfat da Mşihoye u da tawdiyotho hrene du Iraq mawdacle di hile dıkmisımowa ba tapowiye du zbono u şqolo da bote du camaydan naqiso mi şato da 2017 u hul ucdo.

U rişono du şutoso di mşaynutho athronoyto du Iraq rabhaylawotho Cabd Alğani Alasadi, sımle socurutho li cito d’Mort Şmuni da Suryoye Ortodoksoye dkıtyo bi mditho d’Barıtle bi daşto d’Ninwe, u mıştawtafle camu camaydan lu Qurobo Alohoyo dımtayıb bi cohnutho du cedo du mawlodo. Alasadi bi maqırhonutho dhule, mawdacle du camaydan mahwewole klayotho di gaborutho ba qrobe du huroro du Iraq ma marhıbone d’Dacış u bu maşıqlo dbıthır mu huroro.

Alasadi mırleste; Ono sımwoli socurutho li cito d’Mort Şmuni bu şuroyo du huroro d’Barıtle, u mıştawtafwoli lu Qurobo alohoyo qadmoyo dımtayabwo bıthır ma qrobe. Wu ucdo naqla hreto dacırno li cito, leşan dmıştawtafno lu cedo du mawlodo. Me gabo hreno, u mdabrono du tboco froso u da esore gawonoye du diwan da waqfat Mşihoye du Iraq qaşişo Marten Hırmız, mawdacle di sbutho du kboşo da mulkone du camaydan dımgalwele mu Iraq, nafqowa li holo ba 2015 u da 2016. Umu zabnawo u hul ucdo u diwan da waqfat mıştawtafle la fulhone di sictho dilonoyto dımşatsowale u rişwazire catiqo Haydar Alcibadi.

Qaşişo Marten mırleste; Lfuth a fuqdone di sicthathe, tlib mi wazirutho di kinutho dmaydo tedbire qonunoye wi wazirutho hula amro la dairat kulle du qadastro dmitahwe xabro lu diwan da waqfat i naqla dmitahıt bayto dkıtyo u morayde Mşihoyo lu zebono. U bebzabno lıkmitahwe fsoso dmizabın u bayto d’Mşihoyo dlowe awyutho mi xasra du diwan da waqfat. U camgabıdathe a botaydino lıkmaydi fusqono ida dlo mitahwelın mawdconutho mu diwan da waqfat calu Mşihoye dgımizabın u baytayde.

Bu tarano, qaşişo Marten makadle da tedbirani dmahti, ğalabe manqaslın i hile dıkmisomowa ba tapowiye du zebono u şqolo da bote da Mşihoye ma 2017 uhul ucdo. Mxasra hreto, i aykanoyutho haruto bu haqlo folitiqoyo udi mşaynutho tfıkla ğalabe yaqrotho mu camaydan li golutho, bnişo dımqafın haye mşayne b’ğer athrawotho. U mdabrono fatıryarxoyo di marcitho d’Basra udu taymno du Iraq di cito Kaldoyto d’Bobel efesqufo Cimad Albanna, bi maqırhonutho dhule mırle; İ golutho hawyo mede kyonoyo, u ğalabe yaqrotho Mşihoye mgalwelın lu qlimo d’Kurdistan, Yurdnon, Lebnon u Turkiya, u bıthır lan athrawotho du macırbo. Bı d’Basra khoyewo meqım 800 yaqrotho Mşihoye, elo adyawma fayış belhude 300 yaqrotho bi mdito. Calathe, efesqufo Albanna makadle di golutho du camaydan wu dcoraththe lu Iraq sbutho masırtoyo bi aykanoyutho folitiqoyo u di mşaynutho du athro, u mırle; En dmitarkıwo i mşaynutho bu Iraq, ğalabe Mşihoye gıducri bnişo dfulhi u dmarkıwi a hayaththe bu athro me hatho.