Nadine Maenza huwla maqırhonutho cala hayle kaboşe d’Turkiya bu garbay madınno d’Suriya

İ mcadronitho du rişono du Komisyon Amerikoyo di Hirutho Emwothoyto da Tawdiyotho Nadine Maenza, huwla maqırhonutho cali ithutho da hayle kaboşe d’Turkiya bu garbay madınno d’Suriya wu husrono dkobın la mdinoye.

 Maenza bi dafayda du Twitter kalyo cala hawbe dıkmisomi cala qalilotho tawdithoye du qlimano, u mkararla cali ulsoyutho du terkiwo di hirutho tawdithoyto bu garbay madınho d’Suriya.

 Vice Chair Nadine Maenza of the US Commission on International Religious Freedom awkith i mcadronitho du rişono du Komisyon Amerikoyo di Hirutho Emwothoyto da Tawdiyotho Nadine Maenza, dmaczımowa bu darbo du nawlo li tahrazto haytho du froshezwaydan Suroyotv, frısla egrotho frişe bi dafayde du Twitter cali aykanoyutho du garbyo u du madınho d’Suriya.

Maenza grışla ba egrothani u zuhoro cali ithutho da hayle kaboşe d’Turkiya u da marhıbonayda bı dukotho frişe du garbyo d’Suriya, ahjome dıksaymi cal Cayn Cisa, cala qıryawotho d’Seda u Malikiye u calu darbo Emwothoyo d’M4. İ mşalonitho Amerikoyto makadla, da hayle Turkoye u da marhıbonayda kımaşın hawbe mqabıl da Mşihoye, da Ezidoye u da qalilotho hrene, da neşe du qlimano u d’Amerika wu kenşo Emwothoyo, lıkowe d’suxri caynothaye mqabıl da hawbani.

Maenza mkararle i qroyto dsımlın a tukose da zedqe noşoye u mawdacla, d’Turkiya wa marhıbonayda sımlın hawbe du qrobo, hawbe mqabıl di noşutho ba dukotho dkıtne bu duyoqayda bu garbyo d’Suriya u da hawbani kit dothe dcubri bu taro du hawbo du qtolğenso. Ba hawbani dıkmisomi, kmıkboşi, kmitanhıbi a bote wa mulkone da mdinoye, lıktorın du camo docır la dukothayde, khıtfi u kıqutli mdinoye dlatte hawbo, kıdayşi i hirutho tawdithoyto uğer.

Wa hawbaniste mıthabtene ba tahwiyotho dmalimi ba yarhe haroyani mi professore Amy Austin Holmes. Maenza kalyo cali hirutho tawdithoyto ba dukotho dkıtne bu duyoqo di Mdabronutho yothoyto bu garbyo u bu madınho d’Suriya u mahkelaste cali socurutho dsımwola lu qlimo u dı yalifo aydarbo markıwo i hirutho tawdithoyto wi Mdabronutho yothoyto aydarbo dıkhuzyo la sniqwotho da came frişe dıkhoyın bu qlimo wi ulsoyutho rabtho dıkmitahwe lu teqwiyo di athto bıgawe du kenşo.

Wu dıkmitahwe tacbo lu terkiwo di demoqratoyutho u la zedqe noşoye bu qlimano. Bu mamlayda Nadine Maenza mkararla du camaydan, dılo mıtyaqın l’Turkiya, cal bu kboşo u bu cnufyano dsımla Ankara calu garbyo d’Suriya, kımşaklo qento jıddi la qalilotho tawdithoye dilonoyith la Mşihoye u la Ezidoye u bi sbuthathe mqadamla taşrore li şultonutho d’Waşington, dsaymo hboso yaquro cal Turkiya leşan dmıgroşo mu garbay madınho d’Suriya.