Nafıq qetro da maye beyn d’Turkiya u du Iraq

Mşale Iraqoye, sımlın qroyto l’Boğdod dmabdiyo droşo cam Turkiya bnişo dmisafe u qetro da maye du nahro d’Deqlath.

Turkiya dıbdela dmulyo u masxoro d’Ilusu maye, manqasla u xyoro da maye du nahro d’Deqlath lu athro du Iraq.

Turkiya, lo belhude bu haylo folhoyo kımzahro anathrawotho şbobayda, elo bu haqlo da mayeste kımzawrolın. A qoyume Iraqoye dkıtne bi Sictho di zaricutho uda maye bu parlamento du athro, sımlın qroyto li şultonutho d’Boğdod dmabdiyo droşo cam Ankara bnişo dmisafe u qetro da maye.

İ Sictho Iraqoyto mawdacla, du athro mati l’qento jıddi dhowe ebe kriz rabo da maye, bıthır mıd Turkiya bıdewola meqım şato dmulyo u masxoro d’Ilusu ma maye du nahro d’Deqlath. Bebzabno u masxorano d’Ilusu, bdele dmahıt imditho makthabzabnoyto d’Hasno Kifo b’Turkiya, tahte da maye.

Ankara dıbnela u masxorano calu nahro, kmanqıso i kmoyutho da maye dıkxayri lu Iraq. İ Sictho mırla; Boğdod klozım dımsafyo u şwolano, dloste gıdloqina cal qariwo qetre ğalabe jıddi. Ba kımo eşne dıbqamuthayna, gıdtore u masxorano d’Turkiya tathir ğalabe mrimono aclayna.

İ Sictho du parlamento Iraqoyo mırlaste; A cuqobe d’Turkiya calu garbyo du Iraq mathrlın lo towo cala esore dbeyn Boğdod u Ankara, elo naqla hreto klozım a 2 gabe dmabdın droşo calu qetrano da maye, dloste gıdobelan husrono rabo.

U rişqutno Baham Salıh grışwole ba 2019 u zuhoro cali ulsoyutho du şroyo du qetrano da maye cam Turkiya ubi ytawto dhawyowa camu mathlono du rişqutno Turkoyo dcali sbutho da maye. A 2 gabeste mawdacwolın da droşani msimono şafici elo holucdo heş kımdawım u şwolo da maye du Iraq.