Nafıq taxtuşe beyn d’Armenia u d’Azerbaijan

Nafıq taxtuşe qaşye beyn du gayso d’Armenia uda hayle d’Azerbaijan. Hathe inaqla qamaytoyo bıthır mi şato da 2016, dıknofıq taxtuşe qaşye beyn da tıre athrawotho şbobe.

 Ba taxtuşani dkımdawmi hani 4 yawme, mawdıc dıqtil hol 15 folhe ma hayle datre athrawothani dkıtne bu tayımno da Qawqaze.

Nafıq taxtuşe beyn du gayso d’Armenia udu gayso d’Azerbaijan cala thume dbeyn da 2 athrawotho. A taxtuşani dkımdawmi hani 4 yawme, mawdıc dıqtil 15 folhe ma hayle da 2 athrawotho; beynothaye rabhaylawotho du gayso d’Azerbaijan.

Lfuth i mawdconutho dıfriso me Azerbaijan, qtil 11 farsufe; beynothaye mdinoyo bu zabno da taxtuşani dımşarewolın yawme d’Huşabo dışafıcina. Armeniaste athmıl mawdacla, dıqtil 4 ma folhayda. Ba 2016’ste qtılwo 4 folhe ba taxtuşe dhawınwo beyn da tıre athrawotho şbobe.

Armenia u Azerbaijan dkıtne saqıbloye lıhdode, hani eşne yarixe kito mwatyutho beynothaye cali sbutho du qlimo d’Nagorno-Karabakh dkıtyo b’Azerbaijan elo bu duyoqo da hayle dan Armınoye etnikoye dıkmısnodi me Yerevan. Elo Azerbaijan dmaqwela hani zabno u gaysayda, mzaharla Armenia dgımıstacmılo haylo folhoyo calu qlimo d’Nagorno-Karabakh.

Cali mwatyuthathe dıqaşyo beyn da 2 athrawotho, Amerika, Rusya wu Tukoso di Mşaynutho u di Methcadronutho b’Urifi krıhlın u cnufyano. Bezabno u malolo du notarozo gawonoyo d’Emwotho Mhaydotho Stephane Dujarric mawdacle d’Antonio Guterres tlıble dmitaklın a taxtuşani uda gabe kule dmıgroşi mu şuşoto du krizano uma provokasyone.