Naqahreto Turkiya mşarela d’hıjmo cali fnitho d’Tel Temır

A hayle kaboşe d’Turkiya wa marhıbonathe, sımlın hjome hathe cala qıryawotho d’Tel Temır, Şera, al Şahba u Şerawa dkıtne bu garbay madınho d’Suriya.

 Bu zabno da hjomani dsımlın afolhe Turkoye wa marhıbone, huwlın husrono rabo la xtute du kahrobo d’Tel Temır.

Athmıl ba şoce d’casriye, sımlın naqla hreto a hayle kaboşe d’Turkiya wa marhıbonayde cuqobe casye bı zayne yaqure cal dukotho frişe du garbiyo udu madınho d’Suriya. Lfuth a tebe dıfrisi mu qlimo, u gayso Turkoyo wa marhıbonayde mhelın naqla hreto bi qritho d’Um el Keif dkıtyo bi fnitho d’Tel Temır.

Ba hçomani da hayle Turkoye uda marhıbonathe, mıdlın nişo u macımlo wa xtute du kahrobo d’Um el Keif d’Tel Temır ubi netiçe, qtic u kahrobo cali fnitho. Bebzabno a qıryawotho d’Ziara u Deir Jameel bi fnitho Şerawa dkıtyo bu kanton d’Afrin, hzelın husrono ma hjomani dsimi aclaye.

Mawdıc da hjomani d’Turkiya uda marhıbonayda cali fnitho heş kımdawmi. Camatheste a hayle kaboşe mhelın soruhe u mıstacmelın zayne yaqure ba hjome dsımlın cala qıryawotho d’Şera udu kanton d’al Şahba. A hjomani da hayle kaboşe simi cala qıryawotho d’Erşadiya, Tat Maraş u Kafar Anton dkıtne b’Afrin.

Simste cuqobe qaşye cala qıryawotho d’Ain Daqneh u Şex Cisa u m’akıd da hjomani, heş kımdawmi cali fnithathe u hiw husrono lanarcotho ulu mal da comure. Bu zabno da cuqobaniste, a Haylawotho d’Suriya Demoqratoyto; acmaye u Mawtbo Folhoyo Suryoyo b’Tel Temır, kobın funoyo qaşyo mqabıl da hjomani da hayle kaboşe d’Turkiya.