28/02/2020

North Press frısla taşroro cal tarte mharbınyotho d’HSNB

İ dafo du nawlo d’North Press, frısla taşroro cal tarte mharbınyotho ma haylawotho du sutoro d’neşe d’Bethnahrin d’HSNB dkıtlın i wolitho dsaymi u duyoqo hedor di nuqazto folhoyto dkıtlın bi fnitho du Habur bu garbay madınho d’Suriya.

 Ninwe Dilan u Babilonya David mawdaclın du tconaththe du zayno mşahlafle i hzayto dkıtwo meqım cali claymtho Suryoyto-Othuroyto, ube bzabno makadlın dkıtne b’fusqono kamilo dımdafci a’qıryawotho du camaydan du Xabur, mqabıl da hçome du gayso kaboşo dı Turkiya uda grube marıhbone dıksındile.

Ninwe Dilan dkıtyo claymtho Suryoyto dcımra 20 ışne mi mditho di Hasake, wi hwarthayda du zayno Babilonya David dkıtyo claymtho Othuroyto mi qritho dı Tel Sukkari du Habur, ktıcni ucdo u zaynaththe ukolın calu şuro du cafro du akademi folhoyo dı Tel Nıjme bi fnitho du Habur, bnişo dsaymi u duyoqo hedor di nuqaztaththe.

Ninwe mıştawtafwola la haylawotho du sutoro da neşe d’Bethnahrin d’HSNB bu zabno dımşatsiwo i şato da 2015. Ubidotha ktıcno u zayno du Klaşnikov ub’qolo qawyo kımmo li dafo d’North Press “bu zabno dımşatsiwo a’haylawotho d’HSNB mıştawtafli elaye, bnişo dsaymina u sutoro da mdinoyuthaydan udu cafraydan m’kul qento dkımhadadle dilonoyith mu tukoso marıhbono dı Dacış”.

İ mharbonitho Ninwe dkıtwo manciye mi iqarthayda dmıştawtıfo la haye fulhoye, bu fusqono ubu sebyono kamilo dkıtla abico dımşahılfo i hzayto dkito cali claymtho Suryoyto dkıtla balhude fulhono b’gawıd du bayto ubu haqlo du yulfono, u mırla “abcono dımşahılfono i claymtho Suryoyto l’claymtho qwitho dkımdafco i fnithayda wi mdinoyuthayda”.

Ninwe u Babilonya cama hawrotathe d’HSNB udu mawtbo folhoyo Suryoyo d’MFS, şğişoye wın hani zabno bu nfoqo mqabıl da hçome dıksamlın u gayso kaboşo dı Turkiya wa grube dıksındile calu garbay madınho d’Suriya. W’ucdoste i Ninwe wi Babilonya kımkamli i wolithaththe bu sutoro da qıryawotho Othuroye du camaydan wa citothaththe bi fnitho du Xabur.

İ hzaytoste di Babilonya dmıştawtafwola l’HSNB meqım tloth ışne, latyo mşahlaftır mi hzayto dkıtla i Ninwe dkıtyo i hwarthayda du zayno. Lfuth u taşroro dıfrısla North Press i Babilonya i bartho rabtho dkulle yo di iqarthayda, u kmawdıco du bayto hbuşyoyo li claymtho dlayba i claymtho dımgaşmo ebe i şaxsiyayda, cal da cyode catiqe kmahti qayde qum da bnotho ba qıryawotho.

İ Babilonya kımmo “mu zabno dmıştawtafli la haylawotho d’HSNB, zayıd u haylo di şaxsiyaydi udu sebyonaydi. Ubalhude ha nişo hawili dımdafcono u camaydi udsaymono u sutorayde ma hçome marıhbone”.

Ninwe Dilan u Babilonya David uba casrowat dımharbınyotho hrene Suryoye-Othuroye, lıkmıtyaqniwo meqım dgıdothe yawmo udloqın hdode ba gbine du qrobo bi fnitho du Habur, elo i zıctho dmisım sayfo hreno calu camaydan hawi celtho hawrone du zayno.

Check Also

U parlamento d’Australia tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe

U parlamento federaloyo d’Australia, bıha femo tlıble mi şultonutho du Iraq dımşatso şulto…