Ocdo Libya hawi u wahdo du qrobo bıthır me Suriya

Bıthır mu athro d’Suriya ucdo u athro d’Libya hawi u wahdo du qrobo da hayle rabe dkıbci kulha mane dmaydilin sahmo bgawe.

Me gabo Turkiya kımşadro a jatawiye dkıtla b’Suriya lu qrobano me gabo hreno a athrawotho caraboye kmahwın hfuxyo mqabıl du cboro d’Turkiya, Rusya, Amerika, Fransa hın ma athrawotho dkıtne xliti bu qrobano.

Bıthır mu nfolo d’Kadafi a hayle folhoye wa caşıryotho d’Libya hawın tre falqe dhawilın zabno yarixo kobın qrobo mqabıl dıhdode laşan dıha ma falqe dmoyıd imdabronutho du athro kule, elo hul ucdo u lo  ha ma falqe qadır dmoyıd i mdabronutho gawonoyto du athro.

Bi sbuthathe xıda sıbwotho hrene du qrobo u camo kmidış u kmıqtıl u kımgalwe mu athreyda u lı kodıc layko gmaftıl fothe.

Bıthır mu qrobo d’Suriya dhawi ışmo thnihutho Turkiya mşarela dımşadro a jatawiye dkıtla b’Suriya lu athro d’Libya laşan dmaydi duktho camo Sirac dkıtyo u mşalo dıha ma falqe du qrobo d’Libya. Me gabo hreno Rusya u hın ma athrawotho caraboye ksındi Xalifa Xafter dkıtyo u rişono du falqo hreno du qrobo d’Libya.

Bıthır mıd u rişathro du Mısır Abdulfatah Sisi mhadadle Turkiya u hule amro la haylawotho dhowın hadire lu qrobo, şahini a esore da athrawotho dkıtne xılite bi sbuthathe kule. Me gabo Turkiya mşarela dımhadıdo, me gabo hreno calu mabco du Mısır aw u huyodo caraboyo gıdlotım ramhıl laşan dmoyıd fusqono.

Bi sbuthathe u waziro di baroyutho d’Rusya Sargey Lavrov hawile droşe camu barmanyede du athro du Mısır Semih Şukru bi sbutho d’Libya. Lfuth i maqırhonutho dıfrıslın mawdaclın dhowe şalyuthzayno u dlowe qrobo zaynoyo b’Libya.

Be bzabno Amerikaste mawdacla di sbutho d’Libya klozım mışroyo dılo qrobo mawxa tlıble ma falqe kule dmahwın mabco du şlomo.

Me gabo hreno Turkiya ba yawmothani naqqa hreto mşadarla hın ma jatawiye dkıtla b’Suriya l’Libya laşan dımhadro u falqo dkıtla lu qrobo, me gabo hreno u falqo d’Xalifa Xafter mawdacle di mdito d’Sirte lıgmınfıq mina u ucdo sxırlın a darbone dıhawir di mditathe dlıkowe tayısyotho fayri cul mena.