31/08/2020

Pedersson aytawyotho d’Çenev lımhaqaqe lo dowse du şuşoto

I sictho mtaybonitho du nomuso esonoyo d’Suriya, ba ytawyotho haroye dımkamlila bi mditho d’Çenev lımhaqaqla ulo dawse du şuşoto.

Bebzabno, u mathlono d’Emwotho Mhaydotho b’Suriya Ger Pedersson makadle da mıştawtfone la ytawyotho d’Çenev hzelın nuqze mşawtıfe, u mawdaclın dkıtlın mabco dmıştawtıfi l’knuşyo hatho.

U mathlono d’Emwotho Mhaydotho b’Suriya Ger Pedersson bi maqırhonutho dhule lu tboco froso, mıctarafle dbıthır mıdşafıc hedor d’10 ışne calu qrobo, qrihoyo dkito hul ucdo qetre ğalabe casqe bayn di taşdarto di saqıbloyutho u di şultonutho.

Elo Pedersson mırleste “ğalabe fsihoyono dşamıcno la tıre rişone da ytawyotho da droşe d’Çenev u mathlono du rejim d’Suriya wu mathlono di saqıbloyutho dıkmawdıci bkul qrihutho dımqafelın nuqze mşawtıfe baynothaye”.

U rişono di taşdarto da saqıbloye Hadi Albahra bi maqırhonutho dhule mayadle u mamlo d’Pedersson u mırle “kıtwo nuqze mhaddıde dkımmathliwo qetre baynothayna, elo kmıtyaqanno da nuqze mşawtıfe rabtır ma qetrene”.

Megabo hreno, mabuco mi şultonutho dı Darmsuq bi mawdconutho dhule lu ajans d’Sana, mırle “I taşdarto di şultonutho dıkmıştawtıfo la bazare b’Çenev makadla dkıbco dımdawmo u fulhone bı methfathonutho ba ytawyotho dıbqamuthayna”.

Pedersson mawdacle dmatile egartho qrıhto ma tıre gabe dıkmawdıci eba dkıbci dmıştawtıfi naqla hreto la knuşye. U medano Pedersson mawdacle dkıtyo mede mşajacno, elo atarte taşdaryotho lımmatın l’awyutho lo calu cedono uloste cala sebwotho dgıdmıdroşi ba ytawyotho dıbqamuthayna.

Check Also

A gabe u tukose komonist u semoloye mawdelın bu Sayfo da 1915

A gabe  u tukose  komonist baynothemwothoye frıslın maqırhonutho dıkmawdin bu sayfo du cam…