Pentagon rfıdle a tebe d’Amerika gıdmıgrışo me 3 nuqazyotho folhoye b’Suriya

Bi maqırhonutho dhuwle Pentagon lu tboco froso, rfıdle a tebe dıfrisi me dafe frişe du İran dımdace ebeye, d’Amerika gıdmıgroşo me 3 nuqazyotho folhoye dkıtne bu garbay madınho d’Suriya.

U malolo d’Pentagon m’akadle, da tebani qatciyan latne şroro wu missyonaydan lo gıdtoyım u loste gıdmişahlıf bu qlimo.

Dafe frişe du nawlo du İran; beynothaye u froshezwo d’al Alam mawdacwole yawme d’Arbco dşafıcina, dmatile tebo me mabuce folhoye dmathkarlın d’Amerika gıdmıgroşo me 3 nuqazyotho folhoye dkıtne bu garbay madınho d’Suriya.

Lfuth u mabucano du İran’ste, a hayle Amerikoye grişo ma foqudwotho d’al Comar bu madınho d’Deyr Ezzor, Tel Baydar u Qasrak dkıtne qariwe li Hasake. Cala idicatani’ste u malolo d’Pentagon huwle maqırhonutho u rfıdle a tebani du İran.

U malolo Amerikoyo mırle; A tebani qatciyan latne şroro wu missyonaydan b’Suriya cayni’yo ulo mşahlıf. İ ithuthaydan b’Suriya gıdmdawmo, hol dmıqşoci a ğrobe marhıbone d’Dacış ubi sbuthathe’ste gıdmdawım u snodaydan l’QASAD.

İ sagiyoyutho dan arcotho du nafto di Hasake, d’Deyr Ezzor, d’Raqqa bu duyoqo da Haylawotho d’Suriya Demoqratoyto’ne dkobın mrodo camu koalisyon Emwothoyo mqabıl da marhıbone d’Dacış. Amerika kıtla ucdo hol 900 folhe bu garbay madınho d’Suriya.