Plasxart tlıbla duktho mşayanto la Yezidoye

Emwotho Mhaydotho mathkarla u yawmo şatonoyo du qtolcamo dsımle u tukoso marhıbono dı Dacış bhaq da Yezidoye du garbiyo du Iraq.

I mathlonitho du notarrozo gawonoyo d’Emwotho Mhaydotho bu Iraq Jenin Plasxart, sımla qroyto la şultonwotho d’Boğdod ud’Arbil dmotın l’awyutho camıhdode, bnişo dmitarkıwo i mşaynutho bi fnitho d’Şigur bu garbiyo du Iraq.

Bi cohnutho da şeth ışne du qtolcamo dsımle Dacış cala Yezidoye d’Şigur, i mathlonitho du notarrozo gawonoyo d’Emwotho Mhaydotho bu Iraq Jenin Plasxart sımla qroyto li şultonutho qentrunoyto du Iraq wi şultonutho du qlimo d’Kurdistan, d’şorın b’surhobo u kriz di fnitho d’Şigur u dmotın l’awyutho laşan dmibayno i arcutho dıkşuyo la nabne du kenşano dıdocır dbone a’hayayde me hatho.

Plasxart bu buyono dıfrısla, mhanela u mrodo dmahwelın a’Yezidoye bu nfoqo du moro li marduthathe u lu cafrathe, u cal dıkfılhi b’haylo bnişo dqathlın azedqathe cıl mi casqutho dkito.

U buyono kmahkeste cala qetre dıhzelın a’Yezidoye u hatta hani dmaxlısiste dilonoyith a’neşe dıhtifiwo m’Dacış i şato da 2014, uba melani mdawamle ”ba hjome dsıme Dacış cala Yezidoye, ba alfawo d’farsufe mahzamlın la turone, ğalabe menaye qtili, htifi a’neşe wa nacime u simi cabde, u hawın nişo l’gunhe ğensoye bişe. Elo a Yezidoye cıl mu haşano dıkcayşile u cıl ma qetre dıkloqın ucdo bu haqlo momunoyo, folitiqoyo u di mşaynutho heş kıtlın u mabco kamilo d’bonın dactid tawtır laşanaye”.

Mfothıd da casquwotho dkito, ğalabe ma comure d’Şigur hul ucdo lıdaciri la botathe, u cali sbuthathe mırla ”u mede dıktoreli dhayrono b’sabro lafu dactid, u sebyono dkıtlın a’Yezidoye dıkfılhi li hirutho u li kinutho du kenşathe. Elo u krizathe heş lıtayım, u kıtlın heş i casqutho di mşaynutho, di mşablonutho kenşoyto u di mdabronutho mhayadto”.