Professor Fuad Şamcun Odunçu qayithle u şukono celoyo dkito bu athro d’Almanya

Athmıl bu zuyoho dilonoyo dsim u rişwazire d’Almanya Olaf Scholz mqadamle i sohdutho du şukono lu Profesor Suryoyo Fuad Oduncu cal dımqadamle teşmeşyotho rabe şi noşutho ba fulhone dsımle bi osyutho.

U professor Odunçu mgalwewole xıd nacimo d’4 eşne cami iqarthayde l’Almanya mi qritho d’Habsıs d’Turabdin ubu zabno da madraşyotho qrewole tre ferce camhdode-ha cali osyutho wu hreno di falsafe u hawxa mahwele mıqa claymo kaşiro’we dqadır dmaxlıs a 2 ferce yaqure du yufono bkaşirutho.

Bıthır mıd mdawamle bu ferco di osyutho hawi professor u mıdle yulfono dcalu kewo du kanser dkıtyo ha ma kewe yaqure dmiqafelın samone. U professor camgabe da fulhone dsımle bu haqlo du kanser uda darmone, marwahle u maqwele a esore di bethkrihe rabtho du kanser dkıtyo b’Almanya cama bethkrihe hrene d’athrawotho frişr; beynothaye d’Turkiya.

Sımle’ste fulhone beyn du cameydan xıd mathlo mşatasle u huyodo tibeloyo da osye du cameydan u kıtle fulhono, dsoyım sfarmele di osyutho uda samone. U professor Fuad Oduncu dsımle tahrazyotho mşahılfe bu froshezwo d’Suroyo tv mdaşın u şukono celoyo du nesyuno da fulhone di noşutho mu rişqutno d’Almanya.

Camgabe da fulhonani dıksoyım bi ruşmoyutho di osyutho u ğer, kowe mcawnono lan abne du cameydan dıkmısnoqi ele bu haqlo du kanser. U profesor Fuad Şamcun Oduncu dkıtle cwodo dilonoyo dımqafe samono mqabıl du kanser komır; U şukonano, şukono dıkmahwe dıklozım ha dsoyım zıttır fulhone li noşutho’yo.

Cal ışme di mdabronutho d’Suroyo tv kımhanina u profesor du cameydan Fuad Odunncu dmati lhawxa şukono dkıtyo u rabo dkibe dmitahwe l’farsufo ba haye di noşutho.