05/02/2020

Putin u Erdoğan matın l’awyutho dmişawşıto isdirutho beyn da folhathe

U rişono d’Rusya Vlademir Putin wu baramnayde dı Turkiya Receb Tayib Erdoğan matın l’awyutho dıbaroyo maydi tedbire, bnişo dmişawşıto i sdirutho folhoyto bayn da tre athrawotho b’Suriya.

 M’gabo hreno, Amerika mawdacla dıksındo Turkiya bi sbutho da hçome dsimi cala nuqazyothayda du duyoqo bi hiğmonutho d’İdlıb.

 U Kremlen mawdacle du rişono d’Rusya Putin wu baramnayde dı Turkiya Erdoğan, ba n’esore dhawilın camıhdode bu darbo du talafon, matın l’awyutho dmimıd baroyo tedbire laşan dmişawşıto i sdirutho folhoyto bayn da tre athrawotho b’Suriya.

Be bzabno, u Kremlen mawdacle da tre rişone makadlın dıklozım dhowın masre ba fusqone dkito bayn Rusya u Turkiya bi sbutho di fnitho d’İdlıb du garbay macırbo d’Suriya. Lfuth u tboco froso dı Turkiya, Erdoğan hule xabro l’Putin du athrayde gıdmıstacmıl u zedqo dkıtle dımdafıc ruhe ida dhowe hçomo hreno cala haylawotho Turkoye b’Suriya. Erdoğan huleste xabro l’Putin dıklozım a’haylawotho du rejim d’Suriya dmıgroşi ma thume du qyomo d’Soçi.

Be bzabno, Erdoğan bu knuşyo dhawile cama qoyume du gabayde d’AKP, hule muhle lu gayso d’Suriya huli harayto du yarhano dmıgrış hul bıthır ma xtute da nuqazyotho du duyoqo dı Turkiya bi fnitho d’İdlıb, uloste Erdoğan mzaharle da haylawothayde ida dlozım gıdmabdın hçomo oyaroyo ıdi naşfe b’İdlıb.

Erdoğan dmawdacwole dlıgıdtore a’haylawotho du rejim d’Suriya dımqadmi zıd bu cumqo da n’arcotho d’İdlıb, u rejim kul dkothe kmahıt ido cal qastrat u qıryawotho hathe, w’ucdo balhude 2 kilomıtre kfırşile mi mditho d’Saraqıb dkıtyo i nuqazto da grube mzayne saqıbloye bi fnitho d’İdlıb.

M’gabo hreno, u waziro di baroyutho d’Amerika Mayk Pompeo krıhle a’hçome dsımle u rejim d’Suriya cali hiğmonutho d’İdlıb, u mawdacle d’Waşington ksındo Turkiya bıthır mdıhçim ba foqucwotho d’Morter cala nuqazyothayda du duyoqo b’İdlıb. Pompeo mırle “Amerika naqla hreto kmasılyo a’hçome barbroye dlatlın fuşoqo dıkmisomi cala comure d’İdlıb. Ahna ksındina Turkiya dkıtyo u barqyomaydan bu NATO bıthır mu hçomo dsim cala folhe Turkoye, uksındina kulonoyith u rmoşo dı Turkiya bnişo dımdafco ruha mqabıl du hçomano”.