23/03/2021

Qasad frısle buyono bi cohnutho du yowmo şatonoyo trayono du huroro di fnitho d’Albağoz

Adyawma mtayıb hfitutho dilonoyto bi cohnutho du yawmo şatonoyo trayono du huroro di fnitho d’Albağoz mu tukoso marıhbono d’Dacış.

Bi hfituthathe camgabe du zawho folhoyo dımtayablın a hayle d’QASAD, qreste buyono u sim mamle cali mıcne du yawmo.

Bi cohnutho dşafıc tarte ışne calu huroro di fnitho d’Albağoz bu madınho dı Der Ezzor, a’haylawotho d’Suriya demoqratoyto d’QASAD mtayablın hfitutho dilonoyto bi nuqazto du nafto d’Alcumer bu madınho dı Der Ezzor. Li hfituthathe mıştawtafle menyono ma rişone d’QASAD udu koalisyon emwothoyo mqabıl Dacış, mathlone mi mdabronutho mdinoyto dı Der Ezzor, şutose du kenşo mdinoye u menyono celoyo d’şutose gawoye u tibeloye du tboco froso.

İ hfituthathe dımşarela b’qatinto d’şetqo cali ruho da sohde, mdawamla bıthır bu buyono dıfrıslın a’haylawotho d’QASAD udıqre la hadire mu rişono du mawtbo folhoyo di Şaddade Sayıl Alzawbac. Bu buyonano QASAD mawdaclın di zoxutho cal Dacış kımmathlo i netiçe d’qrobe yarixe dımdawamlın şawco ışne, u makadlınste da qurbone dhiwi hawın nuhomo la haye. U buyono mırle ste “u rmoşo da marıhbone wa hçomaththe zayidi bu zabno dıkbışla Turkiya i fnitho, wu medano kmaqrıh dkito esore qawye bayn Turkiya wa marıhbone. Ahna a’mharbone wa mharbınyotho d’QASAD kımakdina lu camaydan u mramrımo dgımdawmina dımhalxina bu darbo d’hawronayna a’sohde, bnişo dsaymina u sutoro di fnitho u dımdafcina a’timoyotho kenşoye wa yuthrone da came mşahılfe du garbiyo udu madınho d’Suriya bu telolo di mdabronutho yothoyto dkıtyo u mathlo standard du şroyo du kriz d’Suriya, kımakdina ste dkıtna b’fusqono kamilo dımcaqbina a’marıhbone dı Dacış ayko dhawın, udsaymina u huroro du cafro d’Suriya ma kaboşe”.

Camgabıdathe, mşadır li hfituthathe egrotho ğalabe da tahanyotho u simıste mamle folitiqoye u folhoye, baynothaye u mamlo du mawtbo folhoyo dı Der Ezzor, u mamlo du koalisyon emwothoyo, u mamlo du şutoso da yaqrotho da sohde dı Der Ezzor u ğer.Bu huthomo di hfituthathe, myaqri a’şutose folhoye d’QASAD, u hın ma şutose mdinoye du garbiyo udu madınho d’Suriya wu koalisyon emwothoyo.