QASAD mawdacle dı taşdarto mi Mdabronutho Yothoyto, baynothaye u Gabo Huyodo Suryoyo, gıdsaymo yawme d’Cruto socurutho li Darımsuq

SURIYA – U rişono da haylawotho du garbiyo demoqratoyo dkıtne falqo ma haylawotho d’Suriya demoqratoyto d’QASAD Abu Cumer Al’idlibi, bi maqırhonutho dıfrısle adyawma bi dafayde du facebook, mawdacle di sictho dhew ela teklif mi mdabronutho yothoyto, gıdsaymo 30 bu yarhano socurutho l’Darımsuq, laşan dımthabto u qyomo dımdewo mu rişqutno d’Suriya Ahmad Alşarıc umu rişono gawonoyo d’QASAD general Madhlum Cabde. 

Al’idlibi mawdacle ste di socurutho dgıdsaymola i taşdarto di mdabronutho yothoyto l’Darımsuq, kmıhşowo dawse ulsoyto ğalabe lafu terkiwo di şalyutho athronoyto wu teqwiyo di hdoyutho du athro d’Suriya. Al’idlibi mahwele ste dkıtle sabro da fulhonani dkıtne çıddi dmamtın camruhaye şroyo kamilo u aminoyo. 

12 bu yarho d’Nison dşaficina, u rişono gawonoyo d’QASAD Madhlum Cabde mıstaqbewole taşdarto mi şultonutho d’Suriya u drışwole acma dmitaklın a’hçome Turkoye calu masxoro dı Tışrin udmitadcıri a’galwoye la dukothaththe, ubebzabno bu knuşyano maglewo cala n’ışmone da hadome di taşdarto di mdabronutho yothoyto dgıdsaymi yawme d’Cruto dıbqamuthayna socurutho l’Darımsuq udkıtne: Sanharib Barsom, Foza Yusıf, Cabıd (H)amed Almihbaş, A(h)med Yuıf, Sozdar (H)aji wa tre malole di taşdarto Meryam İbrahim u Yser Sulayman.  Cabde u Alşarıc 10 bu yarho d’Odor dşaficina, mdewolın qyomo dıkmişakıl m’tmone nuqze, baynothaye dmitaklın a’taxtuşe ba fenyotho kulle d’Suriya, udmıştawtıfi QASAD lu şutoso du sutoro di şultonutho d’Suriya.