13/02/2021

Qasad u koalisyon Emwothoyo maqşelın a cuqobathe cala ğrobe d’Dacış

A Haylawotho d’Suriya Demoqratoyto Qasad wu koalisyon Emwothoyo maqşelın a cuqobathe cala ğrobe marhıbone d’Dacış bu qlimo d’Deyr Ezzor qariwo la thume du Iraq.

 Bebzabno a hayle d’QASAD frıslın maqırhonutho u bı qaşyutho krıhlın a cuqobe dıksaymi a hayle kaboşe d’Turkiya b’Suriya u bu garbyo du Iraq.

U qentrun du tboco froso da Haylawotho d’Suriya Demoqratoyto frıslın mawdconutho cala cuqobe haroye dsımlın a Mharbonayde wa tayosyotho du koalisyon Emwothoyo cala krılyotho da ğrobe marhıbone d’Dacış bu qlimo d’Deyr Ezzor. U qentrun mırle; bı 2 cuqobe mşawtıfe dsimi beyn da hayle d’QASAD udu koalisyon 10 u 11 bu yarhano msıklın 9 farsufe dıkmıthomi hadome d’Dacış u mahıt ido cala zayne, cala buğre dkıtwo acmaye.

Ba cuqobe dsimiwo meqım şabtho’ste, msıkwo 28 marhıbone d’Dacış qariwo la thume du Iraq. Bebzabno ba cuqobe oyaroye dsımle u koalisyon Emwothoyo bu snodo da muttafikayde-d’QASAD udu Iraq, qtile 11 marhıbone d’Dacış ba 2 athrawotho. Me gabo hreno, i mdabronutho gawonoyto d’QASAD frısla buyono u m’akadla, da hayle kaboşe d’Turkiya kımhadri arcutho hathto leşan Dacış.

Mawdıc du nişo da hçomani da hayle kaboşe d’Turkiya b’Suriya u bu Iraq, a came’ne mdinoye’ne u leşan dmahrıwi i mşaynutho wi şalyutho da 2 athrawotho u gawonoyith du qlimo kule’yo. Bu buyonano mawdıc, da hçomani du gayso Turkoyo-lo b’Turkiya kmisomi, elo kmitaybi paralell bu garbyo ubu madınho d’Suriya uba turone d’Gare u d’Nuhadra du Iraq.

QASAD mawdacle, da hayle da came du garbay madınho d’Suriya huwlın hani eşne ağono leşan u qşoco d’Dacış u ideolojiayde elo u nişo d’Turkiya ba cuqobani dıksaymo, dobo haylo hatho l’Dacış’yo u camathe’ste, dmaklıyo a hamlat dıkmitaybi leşan dmitatım u tukoso marhıbono’yo. Calathe sim qroyto lu kenşo Emwothoyo ula hayle du koalisyon Emwothoyo dlo fayşi şalye mqabıl da hçomani dıksaymo Turkiya.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…