Qatar gıbone masığde b’İtalya

İ şultonutho d’İtalya hula fsoso lu athro d’Qatar dsonıd a’tarmiyotho du bnoyo d’masığde u şutose Maşılmone bu athro d’İtalya.

Cali sbuthathe, qoyume u mşale folitiqoye İtaloye mahwelın i zucthaththe ma dawsat dkımhalqolın i şultonutho d’Roma dıkmacımsi cayno cali tahrazto dkıtla Qatar dıksındo u rwoho di Maşılmonutho tuhmonoyto.

İtalya mdela qyomo cam Qatar dkobela fsoso dsındo a’tarmiyotho du bnoyo d’masığde u şutose Maşılmone bu athro d’İtalya dıkloqe ucdo kriz momunoyo qaşyo mi celtho du kewo du virus d’Corona.

Lfuth u taşroro dıfrısla i sferyawmo The National da İmrata Caraboye Mhayde, u qyomano gıdobe aftho l’Qatar dmaqwiyo u haylayda b’gawıd d’İtalya, dilonoyith u haylo du grub da n’Ahunone Maşılmone. Lfuth u qyomano, Qatar gıdsındo u şutoso du federasyon da grube uda tukose Maşılmone b’İtalya dıkfolıh xıd mtaltho la masığde dkıtne masre camu grub da n’Ahunone Maşılmone.

Bu taşroro dıfrısla i sferyawmo The National, kmıgrış u zuhoro cala zuze dımşadarla Qatar l’Urifi, baynothaye ba casrowat d’malyune Euro dımbayni lu bnoyo d’masığde u şutose Maşılmobe ba mdinotho d’Milano, Bergano u Siqalya. Be bzabno, bu taşrorano kmıgrış u zuhoro calu şex Maşılmono Qaşyo Yusıf Alqaradawi dkıtyo u qentrunayde b’Dawha, udmahkewole lu froshezwo İtaloyo i şato da 2006 cala hulme dkıtle du kboşo d’Roma. Alqaradawi mırwole “kibe dhowe u medano bu darbo di koruzutho udu idyoloji”.

Ba hfuxye dmahwelın hın qoyume saqıbloye İtaloye, mawdaclın du parlamento d’İtalya kfotıh u darbo qum di propaganda Maşılmonitho tuhmonoyto dıkmısnodo m’Qatar yma n’Ahunone Maşılmone, u mathkarlın ste di methcadronutho dcam Qatar bu haqlo du yulfono udi mardutho kımlakho u athro d’İtalya.

Be bzabno, hın sinatore İtaloye mahwelın i zucthaththe mu rwoho du haylo d’Qatar b’Gawıd d’İtalya u mırlın “a’mşale d’Qatar lıkothın l’İtalaya laşan dsındi fulhone di mcadronutho”.