Surto mido mu hshowo du X di Nadine Maenza
23/02/2025

QATAR: Nadine Maenza mahkela cali Mdabronutho Yothoyto u aydarbo a came qadiri dbonın arcutho mhayadto leşan haye mşawtıfe b’mşaynutho

İ mşalonitho du Tukoso Amerikoyo di Hirutho Emwothoyto da Tawdiyotho Nadine Maenza, hadiro u lumodo dsim bi arişkoyto d’Qatar Dawha. Bu mamlo dsımla Maenza bu lumodano, mahkela cali Mdabronutho yothoyto du garbay madınho d’Suriya u mıqa u kenşo Emwothoyo kibe d’yolıf mu şıkıl du sistemano dmarkıw bu qlimo.

23/02/2025

DAWHA, Qatar — Bıthır ma socurwotho dsımla i rişonitho du Tukoso Amerikoyo di Hirutho Emwothoyto da Tawdiyotho Nadine Maenza bi arişkoyto d’Suriya Darımsuq u dhawila, bebzabno şişaltho d’ytawyotho cam mşale folitiqoye u tawdithoye; beynothaye fatıryarxe, hsayo, kohne u fasrufe hfite du kenşo Mşihoyo, şafico l’Dawha d’Qatar.

Maenza, hadiro b’Dawha, u lumodo Emwothoyo dsim mu Qentrun Tawdithoyo dan athrawotho Şbobe leşan u dialog beyn da tawdiyotho. Bu lumodano’ste kle cali sbutho du terkiwo du şlomo b’britho-dlatyo rakıwto u m’amanto. Bu mamlayda Maenza frışla duktho calu garbay madınho d’Suriya wu adyarbo a came mşahlıfe dıkhoyın ebe, markawlın şıkıl d’sistem dımdabri ruhaye.

Maenza dkalyo’ste cal aydarbo i mdabronuthathe dıkhobış bıgawa a came tawdithoye u etnikoye frişe du qlimo kulle, qadiri dbonın arcutho mhayadto leşan haye mşawtıfe b’mşaynutho u mırla; Fsihono, da mşawtıfe du lumodano qadiri dfuhmi, dhozın u d’yulfi ma camani du garbay madınho d’Suriya, markıwi mdabronutho d’ruhaye dıkmyaqro i hirutho tawdithoyto, uda hayle folhoye dımşataslın’ste-awkith QASAD, dıksoyım u duyoqo di mşaynuthathe.

Nadine Maenza dımkararla cali ulsoyutho di mıştawtıfonutho da came etnikoye u tawdiyotho lhdo tablitho leşan dqudri d’şorın a qetrathe u kalyo’ste bu mamlayda, calu yuqro dıkmitahwe lu şwolo di şawyutho beyn da ğense. Maensa bu huthomo mırla; Kıtli sabro rabo, di mdabronuthu hatho d’nuçho u dnufqo moro la şudoye dhuwla bnişo dmibayın şultonutho mşakalto ma came frişe kulle d’Suriya-cal da camani kışowın l’haye b’şlomo u mşaynutho bu athrathe.