17/06/2020

Qonuno d’Qaysar fayıt la haye b’Suriya

U qonuno d’Qaysar dıkmıhşuw ha ma tedbire qaşye dkulle dmahıtla Amerika calu rejim d’Suriya, adyawma mafıt la haye.

 Amerika bi maqırhonutho dhula, mawdacla du qonuno d’Qaysar mbayın laşan dmıjbır u rejim d’Suriya wa bnayqyomayde d’yıtwi la bazare folitiqoye bi rocyutho d’Emwotho Mhaydotho. Elo Rusya bi maqırhonuthayda mawdacla da tedbire d’Qaysar darbo qaşyoyo lu camo d’Suriya.

 İ rişızgadutho Amerikoyto b’Darımsuq bi maqırhonutho dıfrısla bi dafayda du nawlo, mawdacla da tedbire dmidi mqabıl du rejim d’Suriya lfuth u qonuno d’Qaysar adyawma fayiti la haye, ubebzabno mawdacla d’Amerika gdımdawmo dsaymo u garanti dmote u snodo noşoyo emwothoyo la mdinoye dıkhoyın b’Suriya, wu medano gıdhowe bi zdirutho qwitho dkito bayn da hayle emwothoye bnayqyome dıhdode.

Cali sbuthathe, Amerika mahıtla u rişathro d’Suriya Başşar Al Asad bayn dı tre darbone, ya gıdmaqbıl bu şroyo folitiqoyo du kriz d’Suriya u yaste gıdtocın tedbire momunoye hathe u qaşye. İ mathlonitho d’Amerika bu mawtbo di mşaynutho d’Emwotho Mhaydotho Kili Kraft, bu mamlo dsımla mawdacla d’Waşington mahıtla u qonuno d’Qaysar laşan dmınco Al Asad dıqathle zoxutho folhoyto, u laşan u rejim d’Suriya wa bnayqyomayde dıdıcri la bazare folitiqoye bi rocyutho d’Emwotho Mhaydotho. Kraft mırla “u nişaydan dmıncina u rejim d’Al Asad mu snodo dıkqathleyo, cal dsımle dyoşe b’şıkıl rwiho ıhaq da zedqe noşoye, ucal dımnıcle kul şıkıl d’şroyo folitiqoyo ukali mqabıl dkul aftho du şlomo. U rejim d’Al Asad kıtle tıre darbone qrihe, ya gdımhalıx bu darbo folitiqoyo lfuth u fusqono da 2254 dmıdwole u mawtbo di mşaynutho d’Emwotho Mhadotho, u yaste Amerika gıdmagıldo i mcadronutho du bnoyo u hethotho d’Suriya u gdımdawmo dhatho tedbire momunoye mqabıl du rejim uda mabuce dıksındile. Elo a’tedbirani d’Qaysar gıdmitaklın ida dmakle u rejim d’Suriya ahjome cjiqe dıksamlın calu camayde udımqadım a’ganohe kulle lu bethdino”.

Megabo hreno, u mathlono aminoyo d’Rusya b’Emwotho Mhaydotho Vasili Nipinzya mawdacle du nişo da tedbire hathe dmahtila Amerika cal Suriya, dmitadıryo i şultonutho ruşmoyto du athro, u dmımhe darbo qşitho lu camo d’Suriyayo. Nipinzya bu mamlo dsımle athmıl bu mawtbo di mşaynutho mırle “amşale Amerikoye kmıştabıhri bu qonuno d’Qaysar dgıdhowe i celtho du shofo di aykanoyutho momunoyto u kenşoyto du camo d’Suriya. Atedbirani kmidace du nişaththe u baroyo i şultonutho d’Suriyayo, elo u camoyo dgıdqathle u husrono”.

Lfuth atedbire dımbaynile u qonuno d’Qaysar, magıldi ucdo amcadrınwotho du bnoyo u hethotho d’Suriya, u mahıt tedbire calu rejim d’Suriya ucala şırkat dkımcadrile. Bebzabno u qonuno d’Qaysar mahıtle tedbire cal şutose Rusoye u İranoye dıkfılhi camu rejim d’Al Asad.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…