Qoyume swisroye sıme qroyto li şultonuthathe dseymo hboso cal Turkiya

Qoyume d’gabe frişe bu parlamento d’Swisra, sımlın qroyto li şultonutho du athro dmaqşıyo u hbosayda cal Turkiya.

 A 33 qoyumani mdelın cal egartho mşawtafto, u rızlın adyoşe dıksaymo i şultonutho d’Ankara cala zedqe noşoye b’Turkiya, b’Suriya, bu Iraq, b’Libya u bı Armenia.

Bqroyto msarhabto dsimo lu parlamento d’Swisra, a 33 hadome da mawtbe da kantone udu Mawtbo Athronoyo, sımlın qroyto li şultonutho dsaymo hboso qaşyo cal Turkiya calu dyoşayda dcala zedqe noşoye u tlibste mi şultonutho dımşawhıro u mdoyo du qyomayda u hatho di tagorutho hırto cam Ankara, hol d’Turkiya dımtabqo a fusqone du bethdino celoyo da zedqe noşoye d’Urifi.

Bi egarthathe dmıdyo ma 33 qoyume m’akade i masiruthathe ba timoyotho da zedqe noşoye u tlıbbe mi şultonutho dmaqşıyo zıttır u hbosayda cal Ankara u grışlın u zuhoro cali mdabronutho autoriter du rişqutno Turkoyo wa dyoşe sistematik dsımle cali saqıbloyutho, cala gelyunore ucalu tbocofroso, calu sistem di kinutho, da farsufe hfite uğer.

A qoyume mawdaclın’ste, d’lfuth a istatıstike wa taşrore dıkmisomi ba eşne haroyani cala zedqe noşoye, kıfayşo Turkiya beyn dan athrawotho haroye u dıkmıthomo bu snodo da marhıbone, wi siayse d’Erdoğan’ste kull dkothe kışubho l’siyase d’athro dkıtyo bu qrobo. Bebzabno bi egarthathe griş u zuhoro calu kboşo da marhıbone noqufe d’Turkiya b’Suriya, a cuqobe dsımla Turkiya bu garbyo du Cıraq wu dyoşo di morutho du athro.

Wu camani’ste u snodo d’Ankara l’Azerbaijan bu qrobo d’Qarabax mqabıl d’Armenia wu aydarbo Erdoğan kımnase dsoyım hboso cal athrawotho frişe d’Urifi; beynothaye Swisra. Bi egarthathe a qoyume mawdaclın d’Erdoğan wi şultonuthayde klozım dmahlın a hbosani, dmarfın a yasire kulle, a folitiqoye d’HDP u dmaqimo u fusqonayda mu groşo du lumodo d’Stanbul dkıtyo cala zedqe da neşe. Beyn da 33 qoyume dımdelın i egarthathe kito Carlo Sommaruga, Nicolas Walder, Ursula Schneider Schüttel uğer.