Qoyumo b’Australia ksonıd i mawdyonutho bu Sayfo

Qoyumo hreno d’Australia mdele i maqırhonutho du snodo di mawdyonutho bu qtolğenso dsim calu camaydan, calan Armınoye u cala Yawnoye ban 1915 mi mamlaxtho da Cothmanoye.

Bi maqırhonutho du snodano dımdele u rişono dcala Sicotho di galwoyutho u dcala came şerşoye bu parlamento d’Australia Julian Leeser, kmıtlıb di şultonutho federaloyto d’Australia dmıctarfo ba qtolğense dsim cala 3 came Mşihoye.

Bu yarho dı Şbot dı şafıcina, mşakalwo İnisyatif mşawtıfo di kinutho bu parlamento d’Australia leşan u mdoyo d’maqırhonutho dımtaybowa mu Komisyon Athronoyo dan Armınoye b’Australia, mu Huyodo Tibeloyo Othuroyo u fırco d’Australia wu Mawtbo da Yawnoye b’Australia, leşan u athro dmawde ba qtolğense da 3 camani.

Calathe ucdo, u qoyumo Yudoyo Australoyo Leeser, mawdacle u snodayde lu inisyativano u makadle di şultonutho federaloyto du athro, klozım dmawdıyo bu qtolğenso dsim calu camaydan, calan Armınoye u cala Yawnonoye bi şato dan 1915.

Julian Leeser heş ma 2016 sanodo di mawdyonutho bu qtolğensanoyo. Bi maqırhonutho dhuwle u qoyumo mırle; Lfuth i hzaytaydi, britho fayişo mşawharto bi mawdyonuthathe du hawbano dsımwo meqım 100 eşne. Athi u zabno dkull athro bı britho u athraydanste acmaye, dmıctarıf ebe bu mede dkıtyo qtolğenso barbroyo. Athiste u zabno du rejim d’Erdoğan dmoyıd i mşalutho du makthabzabnathe.

U inisyativano mıdhe hol ucdo ebe me 16 senatore u qoyume frişe du athro, dıksundi i mawdyonutho bu Sayfo. 25 bu yarho d’Şbot, a tukose da 3 camani mtayabwolın hfitutho marduthoyto l’100 hadome du parlamento, mşale di wazirutho di baroyutho, falohe da makthıbe folitiqoye, akademikoye, u falohe du tboco froso u ğer, leşan dmitalım imdat di mawdyonutho bu qtolğenso dsımwola i mamlaxtho da Cuthmanoye calu camaydan, calan Armınoye u Yawnoye bu zabno du qrobo qamoyo dı britho.