Qoyumo Çelik frısle maqırhonutho calu qtolğenso da Pontusoye

U qoyumo du cameydan bu parlamento d’Turkiya Tuma Çelik  frısle maqırhonutho dı krıhle a sayome du qtolğenso dhawi cala Rum Pontusoye bi şato da 1919 bu zabno dhawi sayfo cala mşihoye dımşarewola mi şato da 1914 hul li şato da 1921.

Çelik bi maqırhonutheyde dıfrisole bu dafo du nawlo dkıtle du gabo di HDP mırle adyoma u yawmo şatonoyo dhawi qtolğenso cala pontusoye bi şato da 1919.

İ tahrazto du qtolğenso da mşihoye kımşaryo mi şato da 1914 u kımdawmo sucronoyitho hul li şato da 1921 bu zabnano kmisım qtolğenso sayfo cala Suryoye, Armınoye, Pontusoye wa mşihoye hrene.

U qoyumo kmahke b’zcuryotho mıqa u bayna mditho qtili a pontusoye dıkmote u mınyono gawonoyith l’353 alfo dımwayaclın a hayathe.

U qoyumo Tuma Çelik bi maqırhonutheyde komır, a şıltonwotho dathın b’Turkiya mdawmlın u rınyano du qtolğenso b’siyasat mşahılfe dkımdawmi hul adyoma.

A siyasani da hawbe du qtolğenso kmawbılilan li bcelıdbobutho u lu rhoqo mehdode, elo imwadyonutho wu teqbilo da hawbani gıdmawbılilan l’dactith bahuro.

Bu huthomo komır bu yawmano dkıtyo u yawmo şatonoyo du qtolğenso da pontusoye kayfina rişeyna quma sohde du qtolğensano.