Qoyumo Çelik kımcaqıb isbutho di eqartho d’Diril me qariwo

İ iqartho d’Be Diril dkıtne u babo wi emo du kohno di cito Kaldoyto d’Stanbul, Ramzi Diril, hawilin zıttır me 120 yawme dkıtne mvayce.

 U qoyumo du cameydan bu parlamento d’Turkiya Tuma Çelik dıkımcaqıb i sbuthathe me qariwo, u tboco frososte kımoyıd mawdconutho mene cali ctidutho di iqartho d’Be Diril.

Bıthır mıd u qoyumo du camaydan Tuma Çelik huwole mawdconutho lu tboco froso bhaq di sbutho du htofo di iqartho d’Be Diril u bıthırste dımqafyo i mnohto Şmuni Diril qariwo li iqritho d’Mehre, ajans du qlimo hawile esore cam Çelik.

Bi maqıblonutho dsımle u ajans d’Mezopotamya camu qoyumo Çelik, mahkele gawonyith cali sbutho u sımle sturyo a mşale di şultonutho qlimoyto d’Baytuşabab. Bi mawdconutho dhuwle Çelik mırle; Lawi kroxo makıfyono cali iqartho u lfuth a mawdconwotho dkito, a mşale di duktho lo kızzın cali sbutho metul dıkmitamır d’haylo dkıtyo kontra, sımle u hawbano wa mşale kımkasın calu şwolo.

U qoyumo bu mamleyde komır; Mu yawmo qamoyo bı esoreno cami iqartho d’be Diril u bebzabno hawili ytawyotho cama mşale di duktho u tamo hzeli dkito bsirwotho bu fulhono du kroxo, dlıkmisım. Mathlo lu medano bu zabno dkıtwi su mşalo du Karakol mawdacle, dathile tebo dımqafın bu zabno dkıtwın cawode bu kroxo u azole li qritho u bıthır madıcri. Elo ono mawdaclile dlatyo şrolo dımqafın elo naqla hreto maklelın u kroxo u lazın liqritho.

U qoyumo bi maqıblonutho dsimo acme mahkele bırwihutho cali sbuthathe u mırle; A mşale di duktho dmahwın mabco dımqafın u babo du kohno Hırmız Diril kibın dımqafınne elo layto mabco.