Qoyumo Çelik mqadamle rmoyto leşan uha dobıc moyıd ibarmoyutheyde me hatho

U qoyumo du cameydan bu parlamento d’Turkiya Tuma Çelik, mqadamle rmoyto leşan u camo Suryoyo, u camo Yudoyo wa came hrene leşan dı qudri maydi barmothoyutho me hatho, bı şawyutho da bnaymothoye hrene du athro.

 Bi rmoytathe dımşadrole lu rişono du parlamento d’Turkiya, kmahke cala celotho dıtrelın da tıre camani dımgalwın u dnufqi mi barmothoyutho du athro.

U qoyumo bi rmoyto dımşadrole, kobıc dmisım şuhlofo bu qonuno di barmothoyutho leşan u camo Suryoyo wa came hrene dıjbiri dınufqi mi barmothoyutho du athro ma siyasat di bcelıboboyutho umi frişutho dıkmisım beyn da bnaymothoye d’Turkiya.

Bi rmoyto u qoyumo kroyız a siyasat di frişutho dsimi mqabıl da came dlatne Maşılmone Sunna u dıjbiri dınufqi mi barmothoyutho du athro. A siyasat di frişutho mabdın mi şato dan 1923 uba 1924 u jbir u cameydan dımgalwe me Hakkari. Bi şato dan 1942 kmitahıt madatho calu mal, 6 u 7 İlül dan 1955 sim  hjome cala Mşihoye u ban 1964 i sbutho d’Qufrus u holucdo dkımdawmi a siyasatani bı şıkılat mşahılfe.

Bu zabnano kule hawi hjome di bcelıdboboyutho cala came u tawdiyotho dlatne Sunna Maşılmone. Bu şıkılano lfuth a buhone dsimi, kmawhe ban alfayo dfarsufe d’mawlıdi b’Turkiya mawfaqlın ruhaye mi barmothoyutho du athro. U qoyumo bi rmoytayde kmahke a hawbe dsimi mqabıl da came du athro u komır; Hol dılo misım şbuqyo camu maktabzabno laybe dhowe kinutho bu athro.

Mawxa leşan a came dınafiqi mi barmothoyutho du athro, klozım dmisım şuhlofo bu qonuno di barmothoyutho bnişo da bnaymothoye kulle dhowın bcayni şawyutho u dılo misım furşono cal dkıtlın tawditho aw ithutho mşahlafto.