Qoyumo hreno me Australia snıdle irmoyto du Sayfo

Qoyumo hreno d’Australia mdele maqırhonutho du snodo di mawdyonutho bu qtolğenso dsim calu camaydan, calan Armınoye ucala Yawnoye ban 1915 mi mamlaxtho da Cuthmanoye.

 Bi maqırhonutho du snodano dımdele u qoyumo Australoyo, kmıtlıb di şultonutho dmıctarfo ba qtolğense dsim cala 3 came Mşihoye.

Bu yarho d’Şbot dı şafıcina, mşakalwo İnisyatif mşawtıfo di kinutho bu parlamento d’Australia leşan u mdoyo d’maqırhonutho dımtaybowa mu Komisyon Athronoyo dan Armınoye b’Australia, mu Huyodo Tibeloyo Othuroyo u fırco d’Australia wu Mawtbo da Yawnoye b’Australia, leşan u athro dmawde ba qtolğense da 3 camani.

Calathe ucdo, u qoyumo di marcitho d’Macarthur, Dr. Mike Freelander mdele i maqırhonuthathe u makadle u snodayde leşan u athro kule, dmawde bu qtolğenso dsim calu camaydan, calan Armınoye ucala Yawonoye bi şato dan 1915.

Freelander dkıtyo Yudoyo Australoyo, mnaqewo lu parlamento ba 2016 u hawi ucdo ha me beyn d’8 qoyume u senatore frişe du athro, dıksundi i maqırhonuthathe leşan i mawdyonutho u Sayfo.

25 bu yarho d’Şbot, a tukose da 3 camani mtayabwolın hfitutho marduthoyto l’100 hadome du parlamento, mşale di wazirutho di baroyutho, falohe da makthbe folitiqoye, akademikoye, u falohe du tbocofroso uğer, leşan dmitalım imdat di mawdyonutho bu qtolğenso dsımwola i mamlaxtho da Cuthmanoye calu camaydan, calan Armınoye u Yawnoye bu zabno du qrobo qamoyo dbritho.