Qoyumo Paylan mqadamle rmoyto laşan u teqbilo du qtolğenso da 1915

U qoyumo du gabo Demoqratoyo da Came-Garo Paylan, mqadamle rmoyto lu parlamento d’Turkiya leşan dmawde bu qtolğenso dsımwola i mamlaxtho da Cuthmanoye calan Armınoye bu zabno du qrobo qamoyo .

Me gabo hreno u mqımdino d’Omid mabdele buhono mqabıl du şutoso du Bar cal dımqadamle talab dmitabde buhone calu qtolğenso dan 1915.

U qoyumo Armınoyo bu gabo Demoqratoyo da Came-HDP b’Turkiya Garo Paylan, mqadamle rmoyto lu parlamento Turkoyo leşan dmawde bu qtolğenso dsımwo ban 1915 calan Armınoye u mahkele cali iqarthayde dkull naqla tulbowa i kinutho.

Paylan mırle; Turkiya klozım dluqyo bu dacbarayda u catumo. A yatume-xıd qaşti cayişo u qtolğenso wa farsufe hrene kulle, kubci dhozın i kinutho bıhtır 106 eşne. Qaşti nqilo ma hayani ulo cayşio i kinutho. Babi’ste dkıtwe mu jil da 2, mvayacle a hayayde ulo hzele huweste kinutho. Ucdo ono xıd jil da 3 xıd Armınoyo b’Turkiya, kobacno dhozeno dkito kinutho bu athro.

Bi maqırhonutho di rmoytathe dımqadmole Paylan, kısoyım qroyto du parlamento dmawde bu qtolğenso, dmaqım an ışmone da mtaybone du qtolğensano ma dukotho ruşmoye u dmişahlıf u qonuno da bnaymothoye d’Turkiya. Paylan mawdacle, bu zabno dğalabe parlamentowiye d’athrawotho frişe dbritho mawdelın bu qtolğensano, elo u mede ulsoyo dkulle-du parlamento d’Turkiya’yo dmawde ebe.

Paylan mırle; İnaqla d’Turkiya dlo maydo i sbutho du qtolğenso li ido, i mawdyonutho da hrene lıkfayşla ğalabe ulsoyutho. U qtolğenso dan Armınoye hawi sbutho lğer parlamentowiye uğer rişone d’athrawotho frişe hani 106 eşne-cal dholucdo mankır. A çurhe du camo Armınoyo klozım dmicalçi bi duktho d’xliqi-b’Turkiya. Klozım dnufqina mqabıl du haşano dan Armınoye u dmanihina a çurhano bu darmono di kinutho.

Bebzabno, cali maqırhonutho dfrısle u şutoso da Barowiye d’Omid, ftıhle u mqımdino di mdito d’Omid buhono mqabıl di mdabronutho du şutosano. Bi maqırhonuthathe u şutoso da Barowiye grışle u zuhoro cali ulsoyutho da buhone dıklozım dmisomi calu qtolğenso dan 1915 u mırle; Kıfulğina u haşo da dıbhe du gunhano. Kıtulbina mi qutnutho ula şutosayda kulle dmabdın buhono cala hawbani.