17/04/2021

Qoyumto Pia Steensland mşadarla rmoyto li wazırto di baroyutho du Swed cali mawdyonutho du Sayfo 1915

İ qoyumto du gabo da Mşihoye Demoqratoye du Swed Pia Steensland, mşadarla rmoyto dışwole li wazırto di baroyutho du athro Ann Linde, bi sbutho di mawdyonutho bu Sayfo dan 1915.

Bi maqırhonutho di rmoytathe, i qoyumto Swedoyto kımşaylo li wazırto Linde, en i şultonutho kıtla niye dmawdıyo bu Sayfo dsim calu camaydan u Suryoyo Othuroyo calan Armınoye ucala Yawnoye wu ema, kıtte niye dmawdın bu qtolğensano.

Bi maqırhonutho yarıxto di rmoytathe dımqadmola i qoyumto du gabo da Mşihoye Demoqratoye du Swed li wazırto di baroyutho Ann Linde, bşıkıl rwiho kımahkıyo calu qtolğenso dsımwo cala Suryoye Othuroye, Armınoye u Yawnoye bi mamlaxtho da Cuthmanoye u aydarbo b’şıkıl idactho u mtakso, qtili a camani dlo rahme mcal fothe di tawdithathe i Mşihoyto.

İ qoyumto grışla zuhoro cali barbroyutho du qşoco da Mşihoye udu tehriwo da citotho, da dayre, da dukothathe a marduthoye u makthabzabnoye u aydarbo kbişi a mulkonathe bnişo dmaxlın i mamlaxtho kula ma Mşihoye. İ qoyumto Swedoyto mamtela lu bolo du parlamento du Swed mawdewole 11 bu yarho d’Odor da 2010 bu Sayfo u tlıbwo mi şultonutho’ste dsaymo cayni mede.

Pia Steensland grışla’ste u zuhoro cali mawdyonutho du parlamento d’Urifi u dğer athrawotho bu qtolğenso dsımwolın a marhıbone d’Dacış calu camaydan bu Cıraq ubı Suriya; beynothaye Britania, Almanya, Hollanda, İrland, Luthwania, Australia, Amerika. İ qoyumto mahkela aydarbo a camani kull zabno mafiti b’qtolğenso u calathe ulsoyo’yo du Swed’ste dmawdıyo bu Sayfo leşan dlo mikarıri a hawbani.

Steensland mawdacla d’walaw ğalabe athrawotho mawdelın bu qtolğenso dan 1915, elo bu Swed heş lo mhalıq dawse-wu rişwazire Stefan Löfven huwole şudoyo b’Hovsjö dgısoyım u medano. A nubğe du Sayfo kıtulbi kinutho u Swed klozım dobelın i kinuthathe. Calathe i qoyumto kımşaylo mi wazırto Ann Linde; Bi hzayto di wazırto-ulsoyo’yo di şultonutho ruşmoyith dmawdıyo bu Sayfano leşan dlo mikarır u makthabzabno. Wu inaqla’yo-Ema kıtla i wazırto wi şultonutho niye dımaydi i mawdyonutho du parlamento bu Sayfano bi şato da 2010?

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…