Qritho hreto m’du camaydan b’Zaxo hawyo wahdo du qrobo beyn da hayle da Turk u du gerilla di PKK

Qritho hreto me du camaydan b’Zaxo bu garbyo du Iraq, hawyo wahdo du qrobo beyn da hayle kaboşe d’Turkiya udu gerilla di PKK.

An abne du camaydan di qrithathe kımmi; Hani arbac naqlat kınufqina u kıducrina li qritho mcal fothe da taxtuşani. Fayış lo kudcina layko gıdızzan u mın gıdsaymina.

Bi qritho d’Navkandalan dkıtyo b’Batifa b’Zaxo bu garbyo du Iraq, hawi taxtuşe hathe beyn da hayle kaboşe d’Turkiya udu gerilla di PKK. Bi qrithathe dkıtwe meqım 70 comure, adyawma fayış belhude 40. Ğalabe ma comure’ste nafiqi li golutho. A comure mawdaclın d’tlıbbe ğalabe naqlat sutoro mi şultonutho du qlimo d’Kurdistan umi şultonutho d’Boğdod, leşan dqudri dfayşi bi qrithathe, elo holucdo lo sim mede.

A comure kımawdıci, dkıtne faqire u hani 4 naqlat jbiri dnufqi u ducri li qrith u fayış lıkudci layko gıdızzın. Ha ma comure mırle; Kıtli qatco dıcwone u lıkqodarno dmarcenolın, cal inaqla dıknufqina lu turo kımohe u gayso Turkoyo ba zayne automat ebeye wi PKK’ste lıkturyo dşufcina. Mahzamwolan me Mawsal la qıryawothani mcal fothe da marhıbone d’Dacış wu ucdoste naqla hreto kmıjborina dmahzımina ma hçome d’Turkiya.

U comuro Basim Gabriel mırle; Turkiya wi PKK, xlıqallan qetre wu camo kımahzım ma dukothayde bnişo dımqafe duktho mşayantoelayna. Kull dkothe kıqoşın a taxtuşani u calathe kıtulbina me Emwotho Mhaydotho dımqafyo şroyo lu qetrano-a Mşihoye lo kubci dmaxlın a qıryawothathe elo kmıjbori. Hol 500 yaqrotho me 11 qıryawotho mahzamlın ma botathe.

Mawdıc da kohne lıkqudri dsaymi socurwotho la citotho dkıtne ba dukotho dkowe taxtuşe ebeye u kohno d’Navkandalan mahzamle l’Zaxo ubi harayto di şabtho kıdocır li cito leşan dobe herge tawdithoye u herge du leşono la tloye-dkull naqla kıcayşi bi zuctho. İ claymtho Maryam mırla; Kızaycono ğalabe inaqla d’Turkiya kısaymo cuqobe cala turone.