Qrobo Ukraina: i mwatyutho baynoth Zelinski u Putin komdawmo

BRITHO – U rişqutno d’Ukraina Volodemir Zeliniski sımle knuşyo lu tboco froso bi cohnutho du yawmo şatonoyo da tlotho du qrobo du athrayde mqabıl d’Rusya. Zeliniski bu mamlo dsımle la gelyunore mşalatle bahro cala fulhone dıksaymolın i şultonutho d’Kiyev, bnişo dmiqafe şroyo dıksoyım u garanti di mşaynutho umthoyto d’Ukraina mqabıl d’Rusya. 

Zeliniski bu mamlayde mırle ste “ıno hadirono dıtreno mi wolithaydi b’şart dqathe u athrayde hadomutho bu Nato, udlısaymo Mosko hçomo bceldboboyo hreno calu athro d’Ukraina”. 

U mamlano d’Zeliniski athi luhwoyo xıd funoyo li maqırhonutho dhuwole u rişono d’Amerika Donald Trump dmawdacwole eba d’Zeliniski farsufo dektatoryo cal dlıtrele mi wolithayde udlısımle guboye bu athrayde. 

M’gabo hreno, u rişqutno d’Rusya Vladimer Putin huwe ste sımle mamlo bi cohnutho du yawmo dkımdafci calu athro. Bu mamlayde, Putin mawdacle d’Rusya gdımdawmo dmaqwiyo u haylayda u folhoyo, ulıgıdtıryo an’arcotho dıfsıqlın a’comuraththe dkıtne falqo m’Rusya. 

İ maqırhonuthathe d’Putin kmadilo cali mwatyutho qşitho dkito bayn d’Rusya wu Macırbo. Mosko kımqadmo lu rwoho du Nato bi xasra du madınho xıd tehdid şkiho li mşaynutho umthoyto d’Rusya, u mawxa ste i hadomutho d’Ukraina bu Nato kımmathlo xtuto semoqo bu stratiji dkıtla Mosko.