Qtil 10 farsufe hçomo dsim sim cal madraşto Austoria

FRAZ, Austoria — Lfuth u tbocofroso d’Austoria, athmıl claymo d’22 eşne cabır li madraştayde i catıqto bi mdito d’Graz u bdele dmarıs buğre bu zaynayde b’2 qeloyotho. Bıthır mu mhoyano ba yolufe da sedre, u farsufo kıqotıl ruhe bhdo ma bethyame di madraşto.

Bu hçomano u barbroyo, kmıqtıl 9 farsufe; 7 yolufe uha malfono u hol 28 yolufe u malfono hrene’ste kmiçarhi u kmınqoli la bethkrihe u 4 menaye, i aykanoyuthathe bu qento’yo. İ madraştathe dkıtyo gymnasium, kiba hol 400 yolufe fliğe l’20 sedre.

Baroyo bıthır mu mhoyo, mati u polis u hayle dilonoye di mşaynutho li duktho u m’amanle i madraşto u sxiri a darbone da zabuqone dhedora kulle lu trafik. İ mdito d’Graz kıhoye eba hol 300 alfo bnaynoşo wi mdito trayonitho rabtho du athro’yo wu hçomano’ste, mfaşıq u hçomo qaşyo dsim bu makthabzabno d’Austoria.

U rişwazire Christian Stocker dkıtyo azolo li mdito cam ğer mathlone di şultonutho mırle; Adyawma klozım dmahwena i noşuthaydan. U mede dhawi, kım’athır cal kulayna xıd bnaynoşo, emo u babo u kenşo. İ madraşto duktho di haymonutho, di mşaynutho udu sabro’yo uhano şok’yo dıkmitahrıwi duktho di mşaynuthathe.