Qtil 7 marhıbone dıkımteybiwo hjome cala mşihoye du Mısır

A’haylawotho di mşaynutho d’Mısır bu cuqobo dsımlın bi mditho d’Alqahira, qtilın şawco marıhbone mzayne.

Lfuth i şultonutho d’Mısır, a’şawco marıhbonani kımtaybiwo hjome dgıdmisomiwo cala Mşihoye Eğuftoye bu cedo di Qyamto.

İ wazirutho di gawoyutho d’Mısır bu buyono dıfrısla lu tboco froso, mawdacla dıqtil rabhaylawotho da pwelıs d’Mısır u şawco marıhbone mzayne, ba taxtuşe dhawın baynothaye athmıl casriye bi şawtho d’Amiriya bi erişkoyto d’Alqahira.

Be bzabno, i wazirutho di gawoyutho mawdacla dı tlotho hrene ma puwelıs d’Mısır mçarhi ba taxtuşani d’athın luhwoyo bıthır mıdmatila i wazirutho mawdconutho dkito taxmin dmisım hjome cala Mşihoye Eğuftoye d’Mısır bu cedo di Qyamto dıknofıl yawme d’huşabo dıbqamuthayna.

Bu buyonayda, i wazirutho di gawoyutho d’Mısır mawdacla dhawila xabro dkito grub d’marıhbone dıkmawdın b’ideoloji tuxmonoyo, kmıstacımli kımo dukotho bu madınho ubu taymno d’Alqahira xıd nuqazto elaye, bnişo dsaymi hjome marıhbone cala Mşihoye Eğuftoye bi şabtho du haşo ubu cedo di Qyamto.

Amşihoye Eğuftoye hani zabno yarixo kowın nişo la rdufye ula hjome marıhbone u qtolnafşoye dıkmisomi ma Maşılmone tuxmonoye qaşye d’Mısır. Wi şultonutho lıkmaydo a tedbire makfiyone laşan du sutoraththe.

Bu yarho dı Teşrin u haroyo i şato da 2018, grub d’marıhbone mzayne sımwolın hjomo cal tıre base qariwo mi dayro d’Anba Samuel bu taymno d’Alqahira. Bu hjomano dmıdwole calruhe Dacış qtılwo şawco farsufe u mjarahwo 18 hrene.