21/03/2021

Rişone dı athrawotho frişe umşale d’Tukose Emwothoye frıse egrotho da tahınyotho lu cedo du Newroz

Me gabo hreno, rişone u mathlone dathrawotho frişe u mşale d’Tukose Emwothoye, frıse egrotho da tahınyotho la Kurdoye dıkmcaydi adyawma u cedo du Newroz.

Bi egartho dıfrısle u rişono Amerikoyo Joe Biden bi cohnutho du Newroz mırle; Bı hamimutho rabtho, kımcaydina hani dıkmcaydi u cedano dkıtyo remzo du şuroyo du Rbico. Kıtulbinalın şlomo u şuşoto rabo.

U Newroz, i rişe d’şato hathto da Kurdoye’yo u kınofıl bu zabno dıkbıhro britho u kımşare u Rbico. İ rişe d’şatathe’ste kımşaryo beyn 18-22 bu yarho d’Odor u kıdocır lu Zoroastrism u calathe, kmicayıd’ste ma İranoye umu camo d’Azerbaijan.

A Kurdoye dıkhoyın b’athrawotho frişe dbritho-beynothaye Turkiya, Suriya, Iraq, İran uğer, mtayablın adşato hfitwotho mşahılfotho u mcayadlın u cedano.

Bi wasile du yawmano’ste, mqadım egrotho da tahınyotho lu camo Kurdoyo ubeyn da farsufani kito u mcadrono du mathlono d’Amerika b’Suriya David Brownstein, dhadır camu rişono gawonoyo da Haylawotho d’Suriya Demoqratoyto Mazlum Abde bu zawho du tewqitho di nuro du Newroz bi Hasake. Brownstein tlıble’ste la hadire kulle şato hathto brıxto udu sabro uda hulme da came du qlimo kulle, dmişarıri.

Bi egartho dfrısle u rişono Amerikoyo bi cohnutho du cedano, tlıble şlomo, şuşoto u fhomo towo beyn da came frişe du athro u mırle; U Rbico, remzo du hethotho uda haye hathe’yo. Kımamte camruhe bahro u sabro ba lebawotho da came-me Amerika holu İran, me Asia, a Qawqase, mu Madınho Mescoyo uhol Urifi. Remzo du iqoro da haye’yo wi egarthathe adyawma zıd ma zabne hrene kulle, kıtlan sniqutho ela.

Biden mırle’ste; Klozım dfulhina camhıdode, leşan dnufqina mu haşo uma husrone dcayşina bu dacbar leşan dhowina hadire la yawme hathe dgıdowın u dfulğina u dactidhano bu şlomo ubu şuşoto. Bebzabno i mathlonitho d’Emwotho Mhaydotho bu Iraq Jeanine Hennis-Plasschaert mhanela athmıl a Kurdoye Iraqoye bu cedo du Newroz u mırla; Kıtulbina du cedano dhowe wesile l’sabro u haye hathe bu athro u drokıw harmoni u ahonutho beyn da came Iraqoye kulle.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…