01/04/2021

Rişone dı athrawotho mşahlıfe mcayade u cameydan bu cedo d’Ha Nison

Bıthır mu rişwazire d’Australia, ucdoste a rişwazire d’Armenia, du Iraq u du qlimo d’Kurdistan, frıslın egrotho u mcayadlın u camaydan bu cedo umthoyo d’Ha Nison.

Ba egrothaniste mawdıc; Ha ma bıtlone tawdithoye u umthoye catiqe, remzo du hethotho du kyonoyo u da haye hatheyo. Kıtulbina di şato hathto Bıbloyto, dhuwyo brıxto lu camo Kaldoyo Suryoyo Othuroyo.

U rişwazire d’Armenia Nikol Paşinyan, mcayadle i şato hathto du camaydan dıkhoye b’Armenia, dhuwyo brıxto u mırle; Kıtolabno me lebi kule lu camo Othuroyo dıkhoye b’Armenia, Ha Nison dhowe brixo acle. U yawmano dkıtyo ha ma ceyode catiqe di noşutho, remzo’yo du hethotho u şuroyo d’şato hathto’yo. Calathe kıtulbina du cedano, dobe haye hathe, renye hathe u kuşore hathe.

U rişwazire du Iraq Mustafa al Kadhımi’ste mcayadle u camaydan du athro bi cohnutho du yawmano u mbarxo u mırle; Kıtolabno da botaydan dhowın malye bi hubo, bi awyutho ubi hamimutho. Camhıdode kiban dşufcina u maşıqlano da casqotho leşan dactith bahuro.

U rişwazire du qlimo d’Kurdistan bu garbyo du Iraq Masrour Barzani’ste mşadarle egrotho da tahınyotho lan abne du camaydan dıkhoyın bu qlimo u mırle; Bi cohnutho du cedo d’Akitu-i şato Bıbloyto hathto, kımcayadno u camo Kaldoyo Suryoyo Othuroyo-an ahunone u ahwothaydan u kıtolabnolın burkotho u şuşoto bi şato hathto u kıtlan şubhoro da came du qlimo kulle kıhoyın b’şlomo camhıdode.

Bebzabno u rişono du qlimo Neçirvan Barzani frısle egartho bi dafayde u mcayadle u camaydan u Kaldoyo Suryoyo Othuroyo dıkhoye bu qlimo, bu Iraq u gawonoyith b’britho di şato hathto d’Ha Nison dhuwyo brıxto u dkıtle sabro, da şartat dmicadli tawtır leşan u qlimo kule dqodır dımcayıd u yawmano camu camaydan.

Camaniste, u rişono du gabo Demoqratoyo d’Kurdistan Mascud Barzani mcayadle u camaydan du qlimo u dbritho kula, u makadle du qlimo b’fusqono kamilo’yo dımhafıd calu şlomo ucala haye mşawtıfe dkito beyn da came frişe du qlimo u dmitaqimo i frişutho etnikoyto u tawdithoyto.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…