10/04/2022

Rişonitho du Komisyon Celoyo da Zedqe Noşoye d’Emwotho Mhaydotho Michelle Bachelet grişla u zuhoro cala farsufe mvayce b’Suriya

İ rişonitho du Komisyon Celoyo da Zedqe Noşoye d’Emwotho Mhaydotho Michelle Bachelet sımwola athmıl mamlo bu Mawtbo Gawonoyo d’Emwotho Mhaydotho calu kriz d’Suriya. Bu mamlayde Bachelet, kalyo dilonoyith calu dyoşo da zedqe noşoye b’Suriya wi sniqutho dkito dmisım fulhone msarhıbe, leşan dmi’akdo i ctidutho dban alfayo dıbnaynoşo dkıtne heş mvayce bu athro.

NEW YORK – Michelle Bachelet dkıtwa i athto qamayto dsımwola i rişonutho d’Chile, ma 2018 kısaymo i rişonutho du Komisyon Celoyo da Zedqe Noşoye d’Emwotho Mhaydotho. Athmıl bu zabno du mamlo dsımla cal Suriya bu knuşyo du Mawtbo Gawonoyo d’Emwotho Mhaydotho, grışla u zuhoro cala farsufe dkıtne – me celotho frişe – mvayce b’Suriya.

Bachelet mahkela calu tragedi dban alfayo d’yaqrotho dheş kıcayşi bi cutmo cali ctidutho da hadomathe dkıtne mvayce-walaw kımdawmi a fulhone leşan dmiqafın a farsufani. İ rişonitho mırla; Gabre, neşe u hatta nacime d’11 eşne, kmitafiti b’hawbe di ğensoyutho ba hbuşye du rejim. Hın b’zorriye jbiri dtolın ruhaye, hın htifi uğer’ste mahti ba hbuşye.

Bachelet mırla; “A yaqrothani dıkcayşi bi lo idactho da gabre-dan abne ud nacimathe en ba haye’ne aw lo-klozım dmitaqbıli hınne’ste xıd dıbhe. A yaqrothani kıtte sniqutho msarhabto, dudci mın hawi ba hadome da yaqroththe u dmitahwelın aftho dızzın u dhozanne. Dilonoyith a neşe wa nacime, kıcayşi trauma u casqutho rabtho bi sbuthathe.”

Bachelet rızla a qetre wa casqotho dıkloqın a neşe dfayşi dlo ma gawrathe u dıkmırdofi u lıkmitahwelın snodo uğer’ste, kmıjbori dobın mrodo leşan dlo mimodi a nacimathe menaye. Cali şwolano da mvayce b’Suriya, kımtayb ucdo u Komisyon Emwothoyo taşroro leşan u snodo da yaqrothani. Bi sbuthathe’ste mınyono man abne du camaydan mvayci mcal fothe da tahrazyotho a cçiqe du rejim du Bacth. U ağonisto

U mşalo du wahdo d’Suriya ağunisto Said Malke, 12 bu yarho d’Ob da 2013 bu bethtawso d’Qamışli mıdwo yasiro ma hayle du rejim d’Suriya wa hsayo di cito Suryoyto Orthodoksoyto d’Holob Mor Ğriğoryus Yuhanun Abrohum wu hasyo di cito Suryoyto Malkoyto d’Holob Mor Bulus Al Yaziji, mvayci u heş i ctiduthathe latyo idıcto.

Mşalo du wahdo d’Suriya d’Gabo Huyodo Suryoyo u ağunisto Said Malke