Riyad Aldarrar makadle i Mdabronutho Yothoyto latyo tarmitho du floğo d’Suriya

U Mawtbo d’Suriya Demoqratoyto mahwele u hfuxyayde cali klayto bceldboboyto dmahwela Rusya, Turkiya u Qatar mqabıl di tarmitho demoqratoyto di Mdabronutho yothoyto du garbiyo udu mdaınho d’Suriya.

U rişono zawgoyo d’MSD Riyad Aldarrar, bi hfuxyo dmahwele makadle di Mdabronutho yothoyto latyo tarmitho dıkfulğo Suriya. Bebzabno mawdacle di awyutho dhawyo beyn da tlotho athrawotho lıkmanfıco lu camo d’Suriya, cal du şroyo du kriz du athro belhude bu darbo d’Ewmotho Mhaydotho’yo.

 U waziro di baroyutho d’Rusya Sergey Lavrov, athmıl bu knuşyo mşawtfo dhawile cama tre baramnayde dı Turkiya ud’Qatar, mawdacle da tlotho athrawotho matın l’awyutho dnıfqi mqabıl da tahrazyotho faloğe d’Suriya awkith mqabıl di mdabronutho yothoyto du garbiyo udu madınho d’Suriya.

Calathe, u rişono mşawtfo du mawtbo d’Suriya demoqratoyto d’MSD Riyad Darrar bu hfuxyo dmahwele calu mamlo d’Lavrov, mawdacle dhınne xıd mawtbo folitiqoyo mqabıl du floğo d’Suriya ne, u mırle “ahna ste cami hdoyutho d’Suriyana, uksındina kul şroyo folitiqoyo dkothe bu darbo d’Emwotho Mhaydotho dilonoyith bu darbo du fusqono da 2254. U ahna bu mawtbo d’MSD mqabıl dy floğona, ukmıtyaqnina du camo d’Suriya ha camoyo dkıtle morutho, u ha camo latyo i mıcnayde ha şerşo, cal d’Suriya kmişaklo m’ğalabe came, baynothaye u camo Suryoyo Othuroyo, Caraboyo, Kurdoyo, Turkumanoyo u ğer”. Darra sımle ste qroyto la hayle u gabe saqıbloye kulle, laşan dmımte l’ha nişo mqabıl du rejim dektator d’Suriya, udmişahılfo Suriya l’athro hatho demoqratoyo lo qentrunoyo.

Cali qariwutho harayto dhawyo bayn d’Rusya, Turkiya u Qatar, u rişono zawgoyo d’MSD mırle “i sdirutho bayn d’Rusa wa n’athrawotho qlimoye kcobır bu taro di qale dkito bayn d’Rusya u Amerika dilonoyo. Ukul athro menaye kımnase d’gorış lafele athrawotho hrene qlimoye. U medano lıkmamte camruhe netiçe msimonitho dkımşarrıro i şalyutho lu camo d’Suriya, u hathe ste cal du camo Suri qayım li rağlo laşan u neshonayde wi hiruthayde, elo Rusya kımnasyo dıdocır u rejim ud’forıs i şultonuthayde m’hatho. İ qariwutho dıkmisomi bu şıklano bayn d’grube d’athrawotho lıkmanfıco u camo d’Suriya, calu du şroyo folitiqoyo klozım dhowe bu darbo d’Emwotho Mhaydotho ulo lu hşowo du gabano aw dawo”.