Robert Palladino makadle d’Amerika latla niye dmıgroşo mu Iraq u mu qlimo d’Kurdistan

U izgado d’Amerika b’Arbil Robert Palladino m’akadle, d’Amerika latla niye dmıgroşo mu Iraq umu qlimo d’Kurdistan.

Bebzabno mawdıc, du koalisyon Emwothoyo dkıtyo bi rişonutho d’Amerika, mşadarle kmoyutho d’lojistik folhoyo la hayle di peşmerge du qlimo d’Kurdistan.

U izgado d’Amerika b’Arbil sımle athmıl mamlo bu knuşyo dsim lu tbocofroso u mahkele cal sebwotho frişe; beynothaye i aykanoyutho du Iraq wi sbutho d’Afğanistan uğer. Bu mamlayde Palladino mırle; Howe leşan a yuthrone d’Amerika bu Iraq leşan i hawrutho stratejikoyto, gıdfayşo Amerika bu Iraq.

Bıthır ma droşe dhawın calu dialog stratejikoyo beyn d’Amerika udu Iraq, mtewo l’awyutho d’Amerika dımşahlıfo i wolithayda u mucdo wazolo belhude dımdarşo a hayle Iraqoye. U qyomano u remzonoyo, sımwo bi ytawto dhawywa beyn du rişono Amerikoyo udu rişwazire Mustafa al Kadhımi meqım yarho.

Calatheste Palladino mawdacle, u qedomo d’Biden baroyo u qriho’we bi sbutho du dawro dkıtle u Iraq leşan u terkiwo di mşaynutho bu Madınho Mescoyo. A hayle Amerikoye dfayşi ucdo bu Iraq lıgmharbi ba xtute du qrobo u belhude gıdhowın camu koalisyon Emwothoyo u gıdhowın mşawrone bu qrobo dıkmitahwe mqabıl da ğrobe marhıbone d’Dacış.

Me gabo hreno u Todd Burrough dkıtyo u mcadrono du mşalo folhoyo dcalu qlimo d’Kurdistan udu garbyo du Iraq m’akadle, du koalisyon Emwothoyo mşadarle athmıl lojistik folhoyo la hayle di peşmerge xıd snodo dqudri dımdawmi u ağonathe mqabıl d’Dacış. U lojistikano’ste kmişakıl me radoyotho folhoyo, zayne uğer.