Rşim cala citotho du cameydan rışome tuxmonoye

Tarte citotho du camaydan b’California d’Amerika, rşim aclaye remze tuxmonoye u da Naziye.

 İ cito Kaldoyto d’Mor Fetrus b’El Kajon wi cito Suryoyto Qatholiqoyto d’Yuldath Aloho, midi bi harayto du yarho dı şafıcina nişo lı hjomo tuxmonoyo. A kohne da citothaniste krıhlın u hjomano u tuxmonoyo dsim cala bınyone da citothathe.

 İ cito d’Mor Fetrus di cito Kaldoyto d’Bobel dkıtyo b’El Cajon wu kursiyo di fatıryarxutho wi cito Suryoyto Qatholiqoyto d’Yuldath Aloho dkıtyo qarıwto li cito Kaldoyto, rşim meqım kımo yawme rşome d’remze du graffiti cala bınyonathe. A remzaniste rşome tuxmonoye u da Naziyewın.

U kohno di cito Kaldoyto Daniel Şaba mırle; Mahısli safrayto u nafıqno larwal u laqino bıhaşo hzeli aydarbo mbahdılo i cito ba rşomani. Baroyo huwlan xabro li mdabronutho di karxutho u bıthır bdelan cam farsufe di jamacaydi dmandıfina i arco wa şurone di cito.

Ahjomani dsimi cala citothaydan latne a qamoye uğer naqlat dhawi hawxa vandalism, xlıqwolın hfuxyo beyn 16 hadome du Mawtbo tahtoyo d’Amerika u tlıbwo dmitabde buhono u dmiqafın a farsufe dsımwolın ahjomani cala citotho. Ğer naqlatste, u polis maglewole calu video dıgriş cal hın farsufe dırşımwolın remze tuxmonoye cala citotho.

Ahjomani dıkmisomi cala citotho du camaydan bı dukotho frişe d’Amerika, bı qaşyutho krih mu mawtbo da citotho Qatholiqoyotho b’Amerika d’mırle; Lo kobina mıcne cala hjomani dıkmisomi cala remze di tawditho Mşihoyto.