Rusya kıbco dmaxliyo u tayımno d’Suriya ma İranoye

Rusya mtayabla tarmitho dı maxılyo u tayımno d’Suriya ma İranoye komır u tboco froso.

Bi mawdconutho kmitawmır du gurub da 5 folhoye d’Suriya dıkmısnıd me Rusya mşarele dıforıs a haylawotheyde bi fnitho d’Darca dkıtyo cala thume d’Urdun du dıknıflo bu tayımno d’Suriya.

Bu qrobo d’Suriya idicoyo dkito athrawotho mşahılfe dkıte haylawotho bgawed da thume d’Suriya.

Hani zabno yarixo Amerika İsroyel u ğer athrawotho ksaymi hboso calu İran dıgorış ide me Suriya, bu tebo dıfris ucdo kmahwe Rusya bu sucrono kıbco dı manıqso u haylo dkıtle u İran b’Suriya.

Bi sbuthathe u gurub da 5 du gayso d’Suriya dkıtyo snido l’Ruysa fısle a haylawotho dı mafitile ma droşe folhoye bi fnitho d’Darca laşan dmawfıq a haylawotho du İran dkıtle harke.

Lfuth u tebo dıfrısla Alcarabiya Rusya u polis d’Rusya wa haylawotho du gurub da 5 dıksaymo jbırlın ahaylawotho du İran dmıgroşi me Draca u Qnetra.

Lfuth i mawdconutho dıfrısla i mşatasto da zedqe noşoye d’Suriya ba hbose dıkmisım me tarafe ğalabe zıttır me 60 folhe iranoye qtili.

Bi sbuthathe idicoyo me zabno lı Zabno a tayısyotho d’Rusya kmaxiri soruhe cala dukotho dkıtle u İran folhe ebaye, mawxa laşan du İran u İsroyel dlı howe qrobo baynothaye Rusya kımnasyo dmawfıqo a folhe du İran me Suriya walaw dıgorış zabno elo bi harayto klozım dnıfqi.

Mabuce hrene kımmi bıthır mu qatlo Qasım Suleymani u haylo du İran mıqa dkothe knoqıs b’Suriya.