Rusya lıkmaqbılo Ayasofya dmisomo masığdo

I cito Rusoyto, mahwela hfuxyo mqabıl du plan dkıtla Turkiya cali cito d’Ayasofya.

 U hfuxyano mahwe, bıthır mıd u bethdino Turkoyo drışle u plan dmişahlıfo i citathe dkıtyo b’Stanbul, masığdo da Maşılmone. Kmıntırste cal qariwo, dmoyıd u bethdinano fusqono bi sbuthathe d’Aysasofya.

I citathe da Bizantoye-Ayasofya dkıtyo mu doro da 6 ubi lohitho Emwothoyto di yortutho, hani zabno grışle u tbocofroso Emwothoyo u zuhoro acla, cal du rişqutno d’Turkiya Recep Tayyip Erdoğan mqadamle talab, dmişahlıfo i citathe l’masığdo da Maşılmone.

Calathe bethdino Turkoyo mıdle meqım şabtho i sbuthathe li ido u drişole u kmıntır cal qariwo, dmoyıd fusqono acla. Calu qedomano d’Erdoğan li citatheste, mahwe hfuxye Emwothoye u krih u qedomano d’Ankara. Ucdoste u hasyo di cito Ortodoksoyto d’Rusya Hilarion athmıl mırle; Qatciyan lıkmitaqbıl dmişahlıfo i citathe l’masığdo.

U hasyo Rusoyo mırleste; Layban ducrina la zabne catiqe. Kıcayşina adyawma bı doro dkıtyo britho mşakalto me came frişe ume tawdiyotho frişe u calathe klozım dımyaqrina a reğşe du camo mhaymıno. İ cito Rusoyto lıkobo mıcne lu nişo du şuhlofo di citathe d’Ayasofya u bıthre du renyano, renyo folitiqoyoyo. Lfuth i hzaytaydan, hano dyoşo di hirutho tawdithoytoyo.

Me gabo hreno u mcadrono du rişono du Mawtbo tahtoyo du parlamento d’Rusya-Duma Petr Tolstoy mawdacle, dkito maşıqle frişe du makthabzabno d’Ayasofya u kulleste masrene bu bınyonano dıklozım kul noşo dımyaqarle. Klozım dmiqadım b’iqoro la dukotho di slutho u mşale u folitiqore xıd Erdoğan, klozım dudciwo u medano.