Rusya mnıcla sfito du qrobo d’Amerika dcubro la thumayda

Hıdo ma sfinotho d’Rusya, mtawaqla u lo trela sfito du qrobo d’Amerika dcubro la thumayda bu yamo du Yaban. Lfuth Rusya, i sfito maşyowa fulhone lo qonunoye bu qlimo.

 Elo Amerika baroyo rfıdla a thomani u mawdacla d’Mosko kımnasyo dkubşo dukotho frişe du yamo du Yaban.

İ sfito du qrobo d’Rusya Admiral Vinogradov, mzaharla adyawma i sfito du qrobo d’Amerika USS John S McCain-dıktucnowa soruhe dıkmohın baroyo bu nişo. Lfuth a Rusoye, i sfitathe d’Amerika maşyowa fulhone lo qonunoye bu yamo du Yaban. Elo a mşale Amerikoyeste baroyo rfıdlın a thomani d’Rusya u makadlın di sfitathe lo sımla mede fawdo elo Moskoyo, dkubco dkubşo dukotho frişe du qlimano.

Amşale Rusoye mawdclın, sfitathe mzaharla a hayle di sfito Amerikoyto dkıtne hadire dmohın eba, en dılo nufqo ma thumathe u dı ducro la thume Emwothoye. Mawdıc di sfito Amerikoyto, cabirowa 2 kilometre lıgawe da thume du yamo d’Rusya. U malolo da hayle du yamo d’Amerika rabhaylawotho Joe Keiley makadle, di sfitathe ba thume Emwothoyewa u zabno kule bu zabno du cuqobo dsaymowa.

Keiley mırle; Amerika lıkaybo rişa qum da tahdide u loste kımaqbılo idicat lo şarire xıd sımla ucdo Rusya dkubco dkubşo dukotho du qlimano du yamo du Yaban. İ sfitatheste lo mawfıqo me ayya thumo du yamo bı britho. Lfuth Mosko, bıthır mu zuhorathe nafiqo bıthır i sfito Amerikoyto ma thumathe. Hawxa gedşe, ğalabe noquso kowın elo kımadili cali bsirutho da esore folhoye u diplomatiqoye beyn Amerika u Rusya.