17/03/2020

Rusya mzaharla da gurube marhıbone b’İdlib me hatho kımtaksi ruhaye

İ wazirutho di baroyutho d’Rusya mzaharla naqla hreto cali sbutho da marhıbone dkıtne bu qlimo d’İdlib.

 Bi maqırhonutho dıfriso mi wazirutho di baroyutho d’Rusya mawdacla, da gurube marhıbone dıkmısnodi me Turkiya u Dacış, me hatho kmaqwın ruhaye b’İdlib.

İ wazirutho di baroyutho d’Rusya bi maqırhonutho dhula bhaq di sbutho d’İdlib mırla: a hayle da gurube marıhbone d’İdlib me hatho kımzayni ruhaye, u kımhaydıri ruhaye dsaymi hjome hathe cali şıltonutho du rejim d’Suriya. Kmahwe da gurube da marıhbone xıd Alkaida u gbino du huroro d’Darmsuq u baynothaye a marıhbone dı Dacış mşarelın zawco hatho u dımtaksi ruhaye laşan dsaymi hjome hathe.

İ wazirutho kımmo u gbino du huroro d’Darmsuq lo maqbewole i awyutho di şalyuthzayno dhawyowa bayn Turkiya u Rusya, mawxa kowe kyonoyo dımtaksi Ruhaye u maydi snodo ma hayle dkıtne bi duktho.

İ wazirutho di baroyutho d’Rusya mırla: a gurube da marıhbone u Dacış bu snodo dıgmaydi me larwal qudri rımşi me duktho lı duktho ba arcotho d’Suriya u dımzayni ruhaye me hatho,  hathe kuyo qento li şıltonutho d’Suriya.

Bu huthomo i wazirutho kımmo a gurube dıkmaydi u darbo di marıhbonutho u da taşniqe i hiyoyuthathe mın dhuyo klosım mi doni ma hawbe dsımlın, bi sbuthathe kito tre darbone bu ağuno dımaqabıl di marıhbonutho ha mane dmidoni wu hrene dmitatimi. Lfuth a mfaşqone hani tıre yawme Rusya kobo zuhoro bi sbutho da marıhbone dı Dacış dkıtne b’İdlib kmahwe i awyutho dsımlın cam Turkiya mwatyo naqa hreto.