Rusya u Sin hulın veto cali mcadronutho noşoyto d’Suriya

Rusya wu Sin bu vetto hatho dmıstacmelın, nafiqi mqabıl di tarmitho du fusqono dkımtalbo dmitawrıxo l’zabno d’şato i tahrazto du şedoro da mcadronwotho noşoye l’Suriya bu darbo da nuqazyotho da thume dcam Turkiya.

 Bi rmoyto dımqadmo ma tıre athrawotho d’Almanya u Beljika, lımbahıs cal mcadronutho dmitafito mi nuqazto du thumo dı Tel Koçer dkıtyo bayn du Iraq wu qlimo di Gozarto d’Bethnahrin d’Suriya.

 Rusya wu Sin mıstacmelın athmıl u zedqo du veto mqabıl di tarmitho du fusqono dımqadmo ma tıre athrawotho d’Almanya ud’Beljika, bnişo dmişawhıro l’zabno d’şato i tahrazto da mcadronwotho noşoye dıkmişadri l’Suriya bu darbo da nuqazyotho du thumo dcam Turkiya.

İrmoytathe dsim quwolo acla bu darbo di kthawto, ktılbo dmitawrıxo i tahrazto da mcadronwotho hol lu siqumo d’10 bu yarho dı Tamız i şato da 2021, uktılboste dımdawmo i mcadronutho dmişadro bu darbo di nuqazto du thumo d’Bab Alsalama wi nuqazto d’Bab Alhawa dkıtne bi morutho du gayso kaboşo dı Turkiya wa grube dı Tahrir Alşam awkith u tukoso du Gbino d’Alnusra dımbayın bi lohitho emwothoyto da tukose marıhbone.

Bi rmoytathe dımqadmo, lımbahıs cali sbutho dıklozım dmıftoho i nuqazto du thumo dı Tel Koçer dkıtyo bayn du Iraq wu qlimo di Gozarto d’Bethnahrin d’Suriya, udıkmıntır bu futohayda dmiqadım mcadronutho l’zıd 5 malyune dıbnaynoşo dıkhoyın bu garbay madınho d’Suriya.

Rusya baroyo bıthır mu vetto dmıstacmela, mqadamla rmoyto hreto dkımtalbo dmitawrıxo i tahrazto di mcadronutho balhude l’zabno d’ışto yarhe, udmişadro balhude bu darbo dıhdo nuqazto du thumo lfuth i mawdconutho dhulın hın ma folitiqoye emwothoye. İrmoytathe d’Rusya ramhıl kmıntır dmisım quwolo acla ma 15 athrawotho hadome du mawtbo di mşaynutho d’Emwotho Mhaydotho.

Hano u veto da 15 yo dıkmıstacımlole Rusya b’Emwotho Mhaydotho mu zabno dımşarele u qrobo d’Suriya i şato da 2011 uhul ucdo.