Salwan Momika mqafe qtilo bi Södertälje, Swed
Bıthır mıdmawqadwole u Qurcan bi şato da 2023 udıxlıqwole ruğzo bu culmo Maşılmono, a’powelıs du Swed mqafelın u galwoyo Ciraqoyo dkıtyo bu şerşo Suryoyo Salwan Momik qtiloyo ba buğre dmarıs acle b’gawıd du baytayde bi mditho d’Södertalje bu taymno d’Stockholm.
SÖDERTÄLJE, Swed – A’powelıs du Swed athilın athmıl casriye xabro dışmic qolo d’buğre bi şawtho d’Hovxo bi mditho d’Södertalje. Ubu zabno dmatın a’powelıs lu benyono hzelın gabro mçarho ba buğre dmarıs acle, u nqile li bethkrihe. Ubıthır mathe a’powelıs Swedoye mawdaclın dıqtil u gabrano dkıtyo Suryoyo udışme Salwan Momika, u ftıhlın buqore bhaq du gunhano.
U bethdino d’Stockholm mawdacle dıklozım adyawma dmadwo fusqono bhaq d’Momika bi dacwa du tewqidayde lu Qurcan udıkmıthım eba dkımşaçıc ba fulhonayde li bceldboboyutho. Elo u bethdino mşawharla u fusqonano cal dıqtil Momika dkıtyo ha ma tre farsufe dıkmıthomi bi dacwathe.
Lfuth u tboco froso gawoyo du Swed, Momika bu zabno dmarıs acle buğre kımcaqabwo i dafayde du nawlo, wu gunho du qatlayde griş hayo.
U tboco froso gawoyo du Swed ste, mawdacle d’farsufo mzayno hçımle calu bayto d’Momika dcımre 38 ışne u marısle acle buğre meqım mıdmahzım l’ğer duktho.
Ucdo ste, a’powelıs du Swed mawdaclın dımsıklın menyono d’farsufe dıkmisım texmin dkıtlın asirutho camu gunhano.
Salwan Momika dkıtyo farsufo mu camaydan mi mditho Suryoyo d’Bağdede bi daşto d’Ninwe, mawqadwole bu qayto di şato da 2023 nusxe du Qurcan, u xlıqwole u medano ruğzo rabo bu culmo Maşılmono.