Sanharib Barsom: mşale folitiqoye u tawdithoye kulle kım’akdi i ulsoyutho dmitayıb lumodo athronoyo bi mıştawtfonutho da came mşahılfe d’Suriya
U gabo du Huyodo Suryoyo d’Suriya d’GHS hawile şişaltho d’lqoyotho cam menyono celoyo d’hayle demoqratoye u rişone tawdithoye bı Darımsuq ubi mditho d’Sweda. Cali sbuthathe, u rişono zawgoyo d’GHS Sanharib Barsom mawdacle da mşale folitiqoye u tawdithoye dyatiwi acmaye, krıfdi dmidbır u maşıqlo folitiqoyo hatho d’Suriya m’ha gabo.
DARAMSUQ/BETH ZALIN (QAMISHLI) – U gabo du Huyodo Suryoyo d’Suriya d’GHS mtayable şişlatho d’knuşye u ytawyotho bi erişkoyto d’Suriya bı Darımsuq, ulaqi ste ba mşale ruhonoye da Druz bi mditho d’Sweda. Cali netiçe da ytawyothani, u ajans da tebe d’Hawar News sımle maqıblonutho camu rişono zawgoyo d’GHS Sanharib Barsom dmahkele cala ytawyothani.
Barsom mırle “khozina ba yawmani dkito fulhone folitiqoye hfite bı Darımsuq, wa hayle folitiqoye kulle dıkfılhiwo larwal d’Suriya, kfılhi ucdo bı Darımsuq dkıtyo i nuqazto du yuqro folitiqoyo b’gawıd d’Suriya. Mxasra hreto, ahna kımnasena dhowe u gabaydan hfito bayn da n’abne du camaydan bı Darımsuq. Uba yawme dıbqamuthayna ste kıbcina dhowe GHS hfito ba fenyotho hrene d’Suriya”.
GHS hawile menyono d’lqoyotho folitiqoye bı Darımsuq, u mtayable ste ytawyotho cama rişone da citotho mşahılfe du camaydan. Cali sbuthathe, Barsom mırle “a’lqoyotho dhawilan camu camo Suryoyo u Mşihoyo gawonoyith ğalabe ulsoyewın, bnişo dmihaydi a’hzayotho dkito bu maşıqlano ducdo dıkşıfco ebe Suriya”.
Camgabıdathe, GHS hawile inaqla qamayto ytawyotho cam hayle u gabe folitiqoye demoqratoye bı Darısmuq, ubi maqırhonutho Barsom mawdacle da ytawyothani ğalabe ulsoyewın, wu nişaththe dmimodi a’hzayotho mşahılfe dkito bi sbutho du maşıqlo folitiqoyo d’Suriya.
Gawonoyith Barsom mawdacle di sagiyutho da hzayotho dkito cal Suriya mhaydene, ukulle ste ktılbi ham dmisarhıb u hamıste dhowe şawtofutho kulonoyto bu maşıqlo folitiqoyo hatho d’Suriya. Barsom makadle ste da mşale folitiqoye u tawdithoye kulle krıfdi dımdawım u maşıqlo folitiqoyo d’Suriya dmidabır m’ha gabo, u mathkarle dkulle ste kım’akdi i ulsoyutho dmitayıb lumodo athronoyo bi mıştawtfonutho da came mşahılfe d’Suriya.
