31/07/2021

Şawco farsufe d’iqartho hıdo qtili bu hçomo barbroyo dsımlın a tuhmonoye qaşye d’Turkiya aclaye

Şawco farsufe d’iqartho hıdo, qtili bu hçomo barbroyo dsımlın a tuhmonoye qaşye d’Turkiya calu baytathe b’Konya.

Mqabıl du qtolcamano dsim cali iqartho Kurdoyto d’Konya, gabe frişe d’Turkiya u acmayeste gabe wu qoyume frişe du parlamento d’Urifi mahwelın hfuxye ubı qaşyutho krıhlın.

İ iqartho Kurdoyto d’Dedeoğlu, hawyo dıbho du qtolcamo barbroyo dsımle ğrob ma tuhmonoye qaşye d’Turkiya acla. Bu hçomano dsim calu bayto di iqartho dkıtyo bi şawtho d’Meram b’Konya, hawi celtho lu qatlo da 7 farsufe di iqartho.

Bıthır mu hçomano  dcali iqartho, u ğrob Turkoyo qaşyo mawqadle u bayto bu zabno di iqartho kıtwa bıgawe. İ iqartho Dedeoğlu hawila 24 eşne b’Konya ubu yarho d’İyor d’şafıcina’ste sımwolın 60 Turkoye tuhmonoye naqla hreto hçomo aclaya u mçarahwo 4 hadome di iqartho.

A tuhmonoye gzımwolın i iqartho u mawdacwolın, dlıgtorın dfayşo b’Konya. Wuwalaw i iqartho maşkewola lu polis Turkoyo, elo lo sımwo mede leşan dmiqafın a hayobe. Calu qatlo barbroyo di iqarthathe i Kurdoyto, İHD wu gabo Demoqratoyo da Came mahwelın hfuxyo. İ HDP thımla i şultonutho di AKP bu hçomano u mırla; U mamlo du ruğzo wa provokasyonayda, kowın celtho la hçomani.

Bu zabno di HDP tlıbla dmiqafın u dmiçazın a hayobe, mawdıc dımsik 5 farsufe dkıtte asirutho bu hçomano. Camatheste gabe u qoyume frişe du parlamento d’Urifi d’matilın u tebano, bı qaşyutho krıhlın u hçomo tuhmonoyo dsim cali iqartho Kurdoyto u mawdıc, d’Ankara kıtucno i mşalutho da hçomani dkowın cala Kurdoye ucala qalilotho hrene d’Turkiya.