Senator demoqratoyo Van Hollen komer d’Amerika glozem kulyo b’haylo qum Turkiya bi sbutho du garbay madınho d’Suriya

WAŞINTON – U senator du gabo demoqratoyo b’Amerika Chris Van Hollen, saqıbloyo’yo li siyase dıkmaşyo i şultonutho d’Erdoğan ulu zebono d’tayosyotho d’F-16 l’Turkiya u ğalabe naqlat’ste, tlıble mi şultonutho dmahto klayto qşitho qum di şultonutho d’Ankara b’haqle frişe.

Adyawma’ste i dafo d’al Monitor sımla maqıblonutho camu senator Van Hollen u mawdacle i klaytayde mqabıl du kboşano d’Erdoğan uda noqufayde calu garbay madınho d’Suriya. Bu mamlayde u senator mırle; Biden, b’hboso şalyo elo b’haylo ubı fusqono kamilo kıkole qum da cuqobani dkubco Turkiya dsaymo calu qlimo.

Elo Van Hollen m’akadleste, di kongre d’Amerika kiba dmahto klayto qşeytır mi klayto d’Joe Biden, en dothe Turkiya dmafito u gzomo da hçomayda la haye. Bebzabno Van Hollen mırle; En dothe Turkiya dsaymo cuqobo folhoyo, klozım Amerika u Huyodo d’Urifi dmahti tedbire mşawtıfe acla. Ono kmıtyaqanno, d’Erdoğan madrele u huwle husrone rabe l’Turkiya u hathe kıhozinala, bu zabnano dımqarawlın a guboye du athro.

20 bu yarho d’Teşrin u haroyo sımwola Turkiya hçome oyaroye cala dukotho di Mdabronutho yothoyto uba hçomani qtılwo u huwo husrono rabo lu bınyono tahtoyo du qlimo. A hçomani’ste, mdacewola Turkiya dkıtne funoyo lu hçomo dsımwole QASAD b’Stanbul 13 bu yarho d’Teşrin u haroyo.

A hayle d’QASAD m’akadwolın dlatwolın asirutho bu hçomano. U rişqutno Turkoyo bıdewole bıthır ba gzome d’hçome hathe calu garbay madınho d’Suriya-elo laqiwo ba hfuxye d’Amerika u d’Rusya. Bu zabnano dımqarawlın a guboye d’Turkiya, kımnase Erdoğan bkull darbo-dqomır u snodo du camo bu taro du qetro du momuno u dımvayacla i Lira u timayda.