Senator hreno d’Australia mawdele bu Sayfo da 1915
Senator hreno d’Australia, mawdele bu Sayfo dsim calu camaydan, calan Armınoye ucala Yudoye bu zabno du qrobo qamoyo dbritho.
Bi mawdyonuthathe, mdele u senator u inisyatif mşawtıfo dımbayanwolın a gabe da tlotho camani dıkhoyın b’Australia, leşan i şultonutho du athro dmawdıyo bu Sayfo dan 1915.
U senator Peter Whish-Wilson, mdele i tahwitho du İnisyatif mşawtıfo di Kinutho dımtayabwo bu yarho d’Şbot da 2020 me gabe du camo Armınoyo, du camaydan uda Yawnoye d’Australia. Bi tahwithathe’ste kmıtlıb dhowe mawdyonutho athronoyto bu qtolğenso dsımwola i mamlaxtho da Cuthmanoye cala 3 camani bu zabno du qrobo qamoyo dbritho.
Whish-Wilson dıkm’athıl i marcitho d’Tasmania bu Mawtbo celoyo du parlamento d’Australia mi şato da 2013 uba fulhonayde’ste, kıkole dilonoyith cala şwole da zedqe noşoye. Cali mawdyonuthayde bu qtolğenso dan 1915, u rişono du Komisyon Athronoyo dan Armınoye mhanele u fusqonano du senator, dhawi ha me ba casrowat d’folitiqore, senatore, şutose u tukose frişe dmawdelın bu Sayfo.
Bu mamlo dsımle Haig Kayserian mırle; Cal ışme dan Armınoye, da Suryoye Othuroye uda Yawnoye, kımqadmina a tawdiyothaydan lu senator Peter Wilsh-Wilson dmawdele bu qtolğenso dsımwola i mamlaxtho da Cuthmanoye cala 3 camani. U senator mthabatle, dıksonıd i şrorutho wi kinutho du qtolğensano dhawi celtho lu qatlo dan abohothaydan.
25 bu yarho d’Şbot da 2020, czımwolın a gabe da 3 camani hol 100 folitiqore, qoyume, senatore, diplomatiqoye, akademikoye u mşale da dafe du tbocofroso d’Australia l’hfitutho dilonoyith, leşan u mdoyo d’tahwitho dıkmadilo u snodo da folitiqore du athro li mawdyonutho bu qtolğenso dan 1915.