Sim bu yarhano cuqobo dilonoyo cal qentrun da folhe Turkoye uda marhıbonathe u qtil 22 farsufe menaye

U Mawtbo Folhoyo d’Al Bab bu funoyo dhule la hçome dsımwola Turkiya bu yarho d’şafıcina cali mdito d’Tel Tamır, sımle bu yarhano cuqobo dilonoyo cal qentrun da folhe Turkoye uda marhıbonathe dkıtne bi fnitho, u qtile 22 farsufe menaye.

Me gabo hreno, hamşo grube saqıbloye du gayso Athronoyo d’Suriya dıkmısnıd me Turkiya, mhaydi bıgawe d’gbino hatho dıkmişakıl me 15 alfo farsufe mzayne bu ışmo; U gbino d’Suriya leşan du huroro.

19 bu yarho d’Ob dşaficina, hadımto bu mawtbo di mdabronutho da haylawotho d’Suriya demoqratoyto d’QASAD u tre mharbone mu mawtbo folhoyo dı Tel Tamır, nafliwo sohde bu hçomo dsımwole u gayso kaboşo dı Turkiya calu qentrun da n’esore du mawtbo bi mditho dı Tel Tamır. Bu yawmano qtılwo ste ha ma rişone di YPG bu hçomo dsımwo cali radaytayde, ubebzabno qtılwo ba casrowat mdinoye baynothaye neşe u nacime, ba hçome dsımwola Turkiya bu yarho dşaficina cal Tel Tamır.

Callathe u xıd funoyo la hçomani dsımwole u gayso kaboşo dı Turkiya, u mawtbo folhoyo d’Albab sımle şawco bu yarhano cuqobo dilonoyo cal qentrun dkibe 60 folhe Turkoye u çatawiye bi qritho d’Alyaşli bi fnitho d’Albab, ubebzabno a’mharbone du mawtbo sımlın hçome frişe cal nuqzyotho u qentrune di wolithaththe dsaymi u sutoro du qentrun d’Alyaşli yo. Bi netiçe da hçomani dsimi, a’mharbone du mawtbo folhoyo d’Albab qtilın 12 folhe Turkoye u mçarahlın 11 hrene baynothaye tlotho i aykanoyuthaththe bu qentoyo, ubebzabno qtil 10 çatawiye u mçarıh ste menyono menaye. Camagbıdathe, a’mharbone d’Albab mfarqaclın falqo rabo mu qentrun d’Alyaşli, tre makinat du hforo, u menyono celoyo d’benyone u şurone msatrone cam zayne yaqure da haylawotho Turkoye uda çatawiyaththe.

Mxasra hreto, hamşo grube mzayne du gayso athronoyo d’Suriya dıgrişiwo mi qelayto folhoyto da cuqobe d’Cazm, athmıl mawdaclın dımhaydi camıhdode b’gawıd d’gbino hatho bu ışmo “u gbino d’Suriya laşan du huroro”. A’grube dımhaydi hanine: i gudo d’Al(h)amza, i gudo d’Almuctasem, i gudo d’Sultan Sulayman Şah, i gudo da neşre du garbiyo wi gudo da 20. Lfuth u knuşyo dsim athmıl la gelyunore bu madınho d’Hlob, a’hamşo grubani mhaydi, cal dlayto kaylo mbayno dkımqadım b’şawyutho bi sbutho di mathlonutho da grube mzayne dkıtne hadome bi mdabronutho d’Cazm, ubebzabno laşan dmitatimo i aykanoyutho mbarbazto da grubani dlatlın hul ucdo statuko ha mhaydo, elo kul grub menaye khokım lfuth i çuğrafya di fnithayde uda caşıryotho di duktho. Cali dawsathe dımhalqo, Turkiya m’ayadla i hdoyutho da hamşo grube wu şekolo du gbino hatho.