Sim hçomo zaynoyo calu makthıbo di HDP b’İzmir

Bu zabno da rişone di şultonutho d’Turkiye ksaymi mamle di bcelıdbobutho u di frişutho mqabıl da gabe, farsufo b’falge du yawmo kısoyım hçomo calu maktbo du gabo Demoqratoyo da Came-HDP b’İzmir.  

Bıthır mu hçomano dı qtili hdo claymtho dkıtwa bu makthbo, a gabe mahwelın u hfuxyathe u krıhlın u hçomano dcali HDP.

Athmıl falge d’yawmo farsufo mqabıl da kamerat-u zayneyde b’idothe kıhoçım calu qentrun du gabo d’HDP dkıtyo b’İzmir d’Turkiya u kamrıs buğre dlo hyoro. Bu hçomano kıqotıl claymtho dkıtwa cawıto bu yawmano bu makthbo. Lfuth i mawdconutho dhule u rişono zawgoyo du gabo di HDP Mithat Sancar kıtwolın knuşyo bu yawmano elo i şoctho harayto, mwaxarlın dlo gıdlotamwo qariwo l’40 hadome du gabo tamo.

Bıthır mu hçomano u barbroyo, u gabo di HDP bi maqırhonutho dhule mırle; A 2 gabe dkıtne bi şultonutho kıtucni i mşalutho du qatlo udu hçomano dhawi metul dkull yawmo, kobın maqırhonwotho di bcelıdbobutho u di frişutho dıksaymi mqabıl da came. Bıthır mu hçomano dhawi bu darğo qamoyo a gabe dkıtne bi saqıbloyutho xıdu gabo di CHP wu gabo d’İyi b’qaşyutho krıhlın u matcın i mşaluthayde la gabe di şultonutho du athro.

U mede dkıtyo frişo bi sbuthathe a gabe dkıtne bi şultonutho ste sımlın sturyo u hçomano elo bebzabno u rişono du gabo tuhmonoyo di MHP Devlet Bahçeli bi maqırhonutho dhule mırle; U farsufano dsımle u remzo da Bozkurt lıkowe noşe dımlakıh u gabeydan bi sbuthathe. En a rişone d’athro dkull naqla bu mamlathe drumzi cal gabo aw camo gıdnofıq farsufe xıdu farsufano dkomır; Ono marısli buğre b’idactho u man dhozewo’no bu qentrunano gıdqotalnowole.