Sim hjome da soruhe calu bethtawso d’Emwotho Mhaydotho d’Boğdod

Bi netije di mwatyutho dkımdawmo bayn Amerika wu İran, adyawma mhalıq 3 soruhe dmadrın qariwo mu bethtawso emwothoyo d’Boğdod.

M’gabo hreno, Amerika mawdacla du camo Lebnonoyo bu qentoyo mi celtho du gabo d’Hizballa, u tlıbla m’Emwotho Mhaydotho dmitaqwın ahaylawotho d’Yonifel laşan dqıdri dsaymi u sutoro da thume dbayn Lebnon u İsroyel.

3 soruhe d’Katyoşa dmafiri adyawma ba şoce dfothıd safro, nafili hedor du bethtawso emwothoyo d’Boğdod, wi sictho du tboco froso folhoyo du Iraq mawdacla dlawi husrono bu hjomano dsim.

İ sictho du tboco froso mawdaclaste da haylawotho di mşaynutho mqafelın i nuqazto dmafiri mena asoruhani bi şawtho d’Albakriya bu macırbo d’Boğdod.

Camgabıdathe, hın ma şutose Iraqoye du tboco froso mawdaclın da soruhani mhelın i gefo folhoyto du bethtawso d’Boğdod dkiba haylawotho Amerikoye.

Lfuth a’hazoye folitiqoye, u hjomano kımmathıl halıqto mi şişaltho da egrotho dkımşadarlın u İran l’Amerika bu darbo da noqufayde dkıtne bu Iraq. Bi netije di mwatyutho qşitho dkito bayn d’Amerika wu İran, a’grube mzayne d’Alhaşd Alşacbi baynothaye u gabo d’Hizballa du Iraq wu grub d’Casaeb Ahıl Alhaq u ğer, hani zabno ksaymi hjome cali fnitho yarıqto dkiba i rişızgadutho Amerikoyto wu hjome hrene cal nuqazyotho folhoye dkibın haylawotho Amerikoye. Elo ahjomani naqisi ba şabe haroyani cal dıbritho şğuştoyo ucdo bunfoqo mqabıl du kewo du virus d’Corona.

M’gabo hreno, i rişathızgado d’Amerika b’Emwotho Mhaydotho Kily Kraft bu mamlo dsımla, makadla d’Lebnon kcoyış ucdo kriz dlawiwo xıdwothe meqım, u mawxaste sniqoyoyo ucdo l’şuhlofe dkımamni gade momunoye udıkmaklın u fasad. Kraft bu knuşyo dımtayable u mawtbo di mşaynutho d’Emwotho Mhaydotho bu darbo du nawlo, sımla qroyto dmitaqwın amkone da haylawotho emwothoye d’Yonifel b’Lebnon, u mırla “Amerika heş masırtoyo cam Lebnon xıd şoriko ela, elo ahaylawotho d’Yonifel heş lıqıdri dsaymi i wolithaththe dımamni u sutoro da thume bayn Lebnon wu İsroyel. U gabo d’Hizballa qadır dımkanış zayno udmarwıh ahjomayde. Wu medano qentoyo lu camo d’Lebnon”. Callathe, Kraft tlıtbla mu mawtbo di mşaynutho dmitaqwın amkone da haylawotho d’Yonifel yaste dmitaksi me hatho, bnişo dqıdri dsaymi u mede dıkmıtlıb menaye.