Sim hjomo cali cito Armınoyto d’Stambıl

Bu hjomo dıhawi cali cito Armınoyto b’Stambıl, naqqa hreto nafıq li holo i hzayto dkito b’Turkiya mqabıl di mşihoyutho.

U farsufo dımnasele dmawqıd i cito bu mawdıconutho dhule la pwelıs mırle hanine bıthre du virus di Corona.

Farsufo dlomagle cal ışme mawqadle u tarco di cito da Armınoye Dzinunt Surp Asdvadzadzni dkıtyo b’Stambıl bi fnitho d’Bakırköy msik mu taraf da haylawotho di mşaynutho du athro.

Elo meqım dıyoqıd u bınyono di cito a pwelıs matıle u msıklın u mawbelın li nuqazto da pwelıs.

Bu zabno da Pwelıs dmıdlın u mamleyde dımşayıl men qay abıc dmawqıd cito nafıq li holo i zihniye da mamle dıksaymi a mşale di şıltonutho d’Turkiya, dilonoyith a mşale dıksaymi cali maşılmonutho dkıbci maydi qole ba mamlani.

U farsufano dlımagle cal ışme bu funoyeyde maqbele u mede dsımle u mırle, i celtho d’abıcno mawqadno i cito hanoyo: hanine dsımlın u kewano du Virus di Corona bala lkuleyna mawxa abıcno dmawqadno i citathe.

I sbuthathe du yuqodo athyo lu hwoyo athmıl ba şoce d’Safrayto